هلا اخوي ساوث .. و شكرا على ردك اللي له كل الاحترام.
انا احيي فيك رغبتك اننا نربي عيالنا بنفس الظروف اللي تربينا عليها.. و لكن زماننا غير زمانهم .. ايامنا كانت طويلة و فيها بركة .. الحين تقوم الصبح شوي و الا ليِّلت الدنيا و خلص اليوم.
و ماكانت فيه الاجهزة و الالعاب الالكترونية المشتتة بهذه الكثرة و كانوا المدرسين مدرسين.. و كانت وزارة التربية وزارة للتربية قبل التعليم.
ذيك الايام كان الدوام للجميع كامل و ليس 5 ساعات .. ليش ما تكنسل الخمس ساعات و نرجعه 8 مادام الوضع القديم ممتاز و لا يحتاج اعادة نظر؟
اذكر ايام الامتحانات في رمضان .. مصطفى و ربعه يفطرون بشكل رسمي و معلن .. و ربعنا كثير منهم يفطر بالخش بسبب الامتحانات.
اهل قطر فيهم خير و تشوف الناس في رمضان شايلة المصاحف في الدوامات و الجامعات .. بالنسبة للمسلسلات ما يشوفونها الا الحريم و مب كلهم بعد .. انا عمري ما شفت رجال يتابع مسلسل عربي لا في رمضان و لا غيره.
و بعدين انت بنفسك تناقض كلامك ،، لما تقول ان الناس ما تدل المساجد الا في رمضان!
مافي لا ضغط و لا شىء .. تم نقل جزء من ايام الاجازة الصيفية الى اجازة نصف العام .. وين الضغط في الموضوع؟ و هذا بالظبط ما اقترحه بخصوص رمضان.
الضغط الحقيقي اننا نطالب تلميذ بالاستيعاب و الفهم و هو يصوم ربما اول مرة في حياته .. و اننا نطالب المدرس ان يكون عطاءه( الفكري ) طبيعي و هو سهران في قيام الليل و جوعان و عطشان.. بتقول لي و احنا صغار كان الوضع طبيعي .. ارد اقول لك ايامنا كانت طويلة و فيها بركة مب مثل زمننا هذا. و اغلب الناس دواماتها قريبة و الشوارع مافيها زحمة .. و كانت المجتمعات اسرة واحدة تشيل عن اولياء الامور كثير من المسئوليات.
و اسف على الاطالة .. واختلاف الراي لا يفسد للود قضية