أكيد يا اخوي أتابعه وانتقده في معلومات كثيرة وشوف موضوع اليوتيوب بتعرف .. شحادني أسوي كور تست والفحوصات الثانية موجودة فحص القمع أهمها وورقة معمل الردي مكس متى طلعت الشاحنة وشمكونات الشحنة .. فحص القمع يدلك على محتوى المياه وقوة الخرسانة بعد .. الكور تست تحتاجه في الغالب لبعد عمر من البناء وأخذه لازم بآلة متطورة وبخبرات خاصة حتى مستغرب إن سعره 700 ريال ممكن يكون أغلى أما سعر فحص الكيوب تست المفروض وايد أرخص لأنك انت تسوي غالبية الشغل كمقاول أو مالك والفحص في دقايق في المختبر
عاد مقاولك غرق العينة بالماي أو غرق الخلاط بالماي هذا مقاول خبل ولا يعرف يسوي صالونة سيستمه شوربة خفيفة بس وعنده الماي هو الحياة .. وين الإستشاري وقت الصب ووين المالك لو مطلع وفاهم والأهم رؤيتك للخرسانة بعد صبها هل هي ما فيها فجوات تعشيش وشلوخ واضحة حتى لو شعرية .. الجودة تبين وترقيع المقاول بمواد خاصة بعد يبين وهناك تقدر تاخذ كشطة من فوق وتوديها المختبر لإختبار كيميائي ولو طلع حاط مواد تغطي الكراكات مؤقت تطلب كور تست والمفروض هذا مكتوب في عقدك وعقد الإستشارات والمفروض أكثر هذا إجراء روتيني متسلسل موجود في المواصفات القطرية ويتحمله المقاول كقيمة وقت الشك في التلاعب
إنتقادي يا اخوي مب دوم سلبي أوقات سلبي وأوقات ايجابي وأوقات أنقل المعلومة للإطلاع وتكون صحيحة .. هو وغيره من اللي يعرضون يفيدون الكل بس أوقات قليلة تكون فيه مبالغة منهم أو إختلاف وأوضحه
على سبيل المثال يقول هو لازم تسوي فحص تربة وهذا ممكن لبعض الأراضي وبعض المشاريع بس مب لكل بيت عادي .. من تحفر الأرض تبين لك قوتها ومكوناتها لو مثلاً طينية خالصة وهذي نادرة في قطر وحفرت لمترين وللحين طين وهذي شبه مستحيلة .. هنا معناها تغير حتى نظام الأساسات لكن أرض صخرية متر ونص وكفاية وأسس ودوم تحصلهم مبالغين في مساحة وقوة التأسيس ومقللين من قوة ضغط الأرض .. ولو تبغي تحسبها بدقة هنا بقول سو فحص انضغاط لكل أساس ممكن توفر نص كمية الخرسانات والحديد تحت بس شبتستفيد؟
إذا عرفت إن الأساسات ممكن تكلف 40 الى 50 ألف ريال وانت بهالطريقة بتدفع فلوس للفحص وممكن توفر 5000 أو 10000 وتخسر قيمة الفحص أياً كانت وتخسر وقت ومتابعة
انا اللي يثبت إني غلطان في رأي ينتقدني وأكون مشكور له مب معنى اني أنتقده أقلل من مجهوده هذا نقاش علمي
استطراد للفحص حق التربة أرض قطر غالبها كبريتية لذلك المواصفات تشترط اسمنت مقاوم للكبريتات وحماية ضد المياه المالحة وحتى الرطوبة .. لكن في حالة شخص بيبني في منطقة صبخة مثلاً هنا الله يعينه والوضع صعب يحتاج دراسة وشروط قوية ووصول لعمق تأسيس مناسب أو إختيار تأسيس بالأعمدة أو الخوازيق أو ال Piles الإسم الهندسي لها مع إحلال لبعض طبقات التربة .. أما باقي الأراضي حق قطر معروفة وسهلة