يا إخوان المقاولين واللي داخلين التطوير العقاري وايد منهم يلعبون بالقانون اللي عارفينه هم وممارسينه وايد ودوم يكون الكلام سهل لكن الكتابة والإقرار المكتوب الواضح والموقع وعليه شهود صعب ويمكن مستحيل
كلامك صح اللعب في المواصفات الهندسية والشغل الركيك هذا يكشفه اللي فاهم في البناء .. واضح وضوح الشمس المشكلة فيه أشياء تمر على كثيرين والخبث كبير من بعض الاستشاريين والمقاولين وحتى من بعض ممثلين المكاتب الإستشارية وممثلي المقاولين .. تحصل المكتب الإستشاري قوي وتهمه سمعته لكن فيه مهندس نفسه دنيئة أو خبرته قليلة تمر عليه أمور كثيرة والمشكلة لو كان اللعب في أشياء خطرة يتجاوز عنها وتختفي مع البنيان وتطلع بعد كم سنة .. مثل التعشيش والغطاء الخرساني للحديد والعزل الجيد .. وللسيطرة على هذي الأُمور المفروض تفعيل نظام الإشراف العام من الدولة ومحاسبة المقاول المتجاوز والمهندس المشرف ومكتبه محاسبة قوية ومناسبة
فيه تجهيزات حديثة تكشف كل شيء والزيارات المفاجئة للمشاريع بتبين لهم ركاكة العمل والتجاوزات .. مب قطر تستحق الأفضل وقطر مهمة؟
الحريق من كم يوم اللي صار في البرج اللي له قرون كأنها قرون الشيطان وهذا رأيي في التصميم المعماري .. لو تم ربط رؤوس القرون على شكل دائرة بيطلع أحلى بوايد .. الحريق هذا المفروض ما يصير لو فيه اشراف جيد وصارم من حيث عدم وضع مواد قابلة للإشتعال قرب مصادر نيران أثناء البناء .. وفي النهاية بيدفع البنك وبتروح كديون معدومة أو تسترد على فترات طويلة مما يسبب خسارة البنوك أو تدفعه ظلماً شركات التأمين
ياحبّك للشماتة هههههه ويالله صباح خير "لكن كلامك طبعاً صح"
والقصد أن نستفيد من تجارب بعضنا البعض وابو ضمير صاحي عجبني
فعلاً كلامك صحيح عسى الله يكملك بالعقل والدِّين وبإذن الله تعالى "ما ينخاف عليك"
وجزاك الله خير ياللي فعلاً خليتنا أيضاً نستفيد وبالأخص مِن مُداخلات اخونا ومهندسنا المتميز ابو عبدالله
اللي فعلاً قريت ملاحظاته وأماكن وجود نقاط الضعف وثغرات في القوانين والحلول وقلت ليتهم يمَسكون
واحد في خبرته وغيرته على بلاده وربعه، في منصب تنفيذي لأجل يُصلح كثير من القرارات والقوانين.
ما عليكم زود إخوي بو ماجد وبقية المشاركين والمتابعين
إستغربت سذاجة التعديلات على القوانين للبناء منها على عجالة ترك 1 متر من حدود الأرض لأي بيسمنت قرب الحدود مع الجار كارتداد والحفر بعده واعتقد السبب عدم التأثير على بنيان الجار
زين باسئل سؤال قبل كان في الوضع العادي بدون حتى بيسمنت يتم الحفر لعمق متر ونص للأساسات أو يوصل مترين أوقات وعلى الحدود للملحق أو المجلس شفرقت لو حفرنا زيادة للبيسمنت وسوينا جدار خرساني .. ممكن هم يحددون العمق كمثلاً 3 أمتار مع مسؤولية من يحفر عن أمان الحفر وممكن يحفر شوي ويسوي طوق خرساني أو جدار استنادي خرساني ويكمل حفر وممكن قبل ليحفر يحط سنادات دعم حديدية ويبني هذا الجدار ويكون داعم اضافي .. المتر هذا شبيفرق وشبيفيد؟ زين لو خلينا متر قرب السور وسوينا البيسمنت بعد المتر بيبقى عندنا متر طاير فوق حول 3 أمتار لو سوينا عمق البيسمنت 3 متر ولو حد يسقط منه ممكن تنكسر رقبته ولا نستفيد منه .. في رأيي لو بنأسس حق بيسمنت وللسور مرة وحدة بدون ارتداد أفضل لنا وللجار والجار لو كان باني بيسمنت ما بيتأثر ولو مب باني بعد عادي بيكون جدارنا وتأسيسه قوي كفاية وهنا تدخل تفاصيل الجدار الإستنادي وعزله وفصله عن جدار الجار بحدود 2 سم فاصل إنشائي يفصل الأرضين في حالة هدم أرض ما بيتأثر بنيان الجار ولا حتى ينلمس
وللحديث بقية أكيد