إكتشاف المواهب

[أبوماجد]

وعليكم السلام اخونا بوماجد ..

مرات الواحد تكون عنده موهبه بس ماعنده شغف فيها ..
ولو عنده شغف فيها راح يبدع عالاخر لانه بيعمل بحب ورغبه في هالشي ..

انا اعرف اطبخ بس ماعندي شغف بالطبخ لاني اطبخ مجبورة ..
ومرات اسوي اشياء يقولون لي ليش ماتفتحين مشروع حلو اكلج لكن ماعندي رغبه ابد ..
:
قبل 12 سنة كان عندي شغف بالفوتوشوب وافتح البرنامج ومااعرف استخدمه ..
صعب علي وايد .. وكنت اشوف الناس تسوي تواقيع للمنتدى ولا تلعب بالصور وكنت خلاص منهاره ابي اتعلم كل ذيله ..
فجأة بديت اشوف دروس واطبق وخلال سنة وحدة صرت فنانه فيه .. هوايه وشغف ..
واشتركت بمسابقات وتطوعت بالداخليه بعمل بوسترات وبنرات وفيديوهات …الخ
وخذت جوايز وتكريم كلها خلال سنة وحدة .. حتى كروت أعراس ودعوات حفلات الكترونيه*
وفيديوهات برشلونه وحتى دينيه كلها دخلت فيها .. خلال سنتين ثلاث تشبعت من الموضوع ..
وعقب ابتعدت بسبه حياتي الاجتماعيه الجديدة ..

:

الحين ماعندي ولا هوايه مافي وقت لشي ..
لكن احاول احط عيالي في اكثر من شغله واحاول اشوف شيحبون ..
اخليهم يجربون كل انواع الانشطه الرياضيه او الثقافيه ..الخ
لكن للحينهم في عمر التشكيل للشخصيه والرغبات ..

:

هذرت وايد شكرا عالموضوع بوماجد

إن كانت هذي هَذرَة .! فيا زينها وكثري مِنها عسى عُمرك طويل أختنا العزيزة ( ســــارة )

بالنسبة للحديث عَن الأبناء واكتشاف المواهب والبحث عنها فإني أشوفها مثل "الحَدَاق"

نرمي الخيط ونختار الييمة المُناسبة "الطُّعم" وننتظر ايش اللي راح نلاقيه في هذا البحر الواسع ؛

عجبني حديثك واسترسالك وإضافتك الجميلة والأمثلة الإثرائية كـَـ ( الطبخ ) و ( الفوتوشوب )

الحَديث عَن الشغف جميل وربطه بما نُحبه وما نمارسه فعلاً ينتج عنه موهبة تتفاوت نسبة إجادتها

مِن إنسان إلى آخر؛ فهل السبب يكون في الموهبة الفطريّة أم في كثرة المُمَارسَة لتنتج عنها الموهبة؟

بالنسبة للحديث عَن الوقت وبأنه كان السبب الرئيسي للتخلي عَن الهوايات فبالفعل راح يأثر بشكل كبير

وقبل حوالي سنتين وشوي حضرت دورة تدريبية خارجية تخصّصيّة وخبّرت الدكتور بأنه كان ودّي أني

آخذ دَورة في ( إدارة الوقت ) فالله يجزاه خير كان يخصص لي جزء مِن الوقت كل يوم ويدربني على

إدارة الوقت وفي آخر يوم أعطاني المختصر المُفيد في فَن إدارة الوقت وكان كالتالي :

1) مهم وعاجل
2) مهم وغير عاجل
3) غير مهم وعاجل
4) غير مهم وغير عاجل

الأولى تقومين فيها بنفسك ، والثانية أيضاً ولكن تأتي في الترتيب الثاني

الثاثة لازم تفوضين أحَد فيها مثل زوجك أو بناتك وأولادك وممكن أيضاً الشغالات أو السايق

أما الرابعة فالبعض يؤيّدون تركها مِنَ الأساس وعَدَم الإلتفات لها لأنها تهدر الوقت والطاقة ؛

لا عَدمناك يا أختنا المتألقة دائما "ســـارة" وشكراً على دعمك وحضورك الأنيق دائماً

ودُمتي بأمان ،، وحِفظ الرحمــن

<><><><><>