الله يرزق الجميع الزواج هالوقت استوى هاجس
من ملاحظاتي كم كبير عائلة بنوا بيت مبالغ في مساحته والفكرة يبي كل عياله حوله .. واحد الله فاتح عليه بس تأخر في البنيان كثير .. هو يقول مب مهتم ويبغي الخدمات تخلص وممكن معاه حق بس بيته شبه جاهز
واحد ثاني بنى 5 بيوت ومجلس دفعة وحدة وسكن بس بيته طلع كأنه مجمع البيوت طبق الأصل لو غير شوي فيها بتكون أحلى
كل هذا الهدف الزواج والتكتل في مكان واحد
واحد ثالث بنى بيت ضخم وايد بعد حاب يجمع عياله معاه وصارت مشاكل مع المقاول وقضية وبيته واقف خرسانة وطابوق بدون بلاستر مهجور وموحش
اللي حبيت أقوله العيال بعضهم يحصلون أهل ما يقصرون معاهم بس هم ممكن يقصرون مع نفسهم
الشيء الثاني المبالغات في الأعراس ما احبها كلش وأتوقع وايد يأيدوني لكن الحريم لهم راي ثاني
من اسباب تأخر الفتاة عن الزواج رغبتها في معرفة تفاصيل عن شريك المستقبل (رغم أن المطلب هذا في ظاهرة شرعي ومنصف)، الا أن لا يكاد يكون فيه شجره ما هزها الهواء.. فشنو اللي بتستفيد البنت من تقصي تاريخ الخاطب هل سبق أن خطب قبلها،، شنو نظرته للموضوع الفلاني مثل (قيادة السيارة، السفر مع الأهل.. مع أن هذي أمور سابقة لأوانها).
فترة من فترات حياتي كنت ارفض اي حد يتقدم لي ..
اقول حق الوالده لا تستقبلين حد الا اذا فيه شروطي ..
وكان شرطي ( عدم التدخين / بيت مستقل ) طبعا الاخلاق والصلاة هذي مفروغ منها واخواني كانوا يطلعون السيرة الذاتيه لكل واحد ..
تُنسى ، كأنَّكَ لم تَكُنْ ..
طرشت خاطب يشتغل معيد في الجامعة وتخصصة عقيدة، ولد عمي صلخه بمهر كبير.. والمشكلة ولد العم يقول شكله بخييييل عشان جذي حبيت أشرده؟ مع الأسف ولد العم هذا راعي دين وصلاة لكن بلانا هو الوجاهة نموت عليها موووت وننسى اي شيء مقابل الوجاهة. لو اعجبه الخاطب ما بيكثر عليه مهر :/
من معوقات الزواج عند الشباب أنهم يبون يتعرفون على زوجة المستقبل! ولا تستغربون، فولدي مثلاََ عشان يشتري سماعة وايرلس مثلاََ يسوي بحث طويل عريض. واذا ماهي من الأجود والأغلى ما يشتريها! فهذا كيف تطلب منه يتزوج وحدة لمجرد أنها من بيت طيب... الخ؟
للأسف عيالنا ما يشبهونا، على الأقل اتحدث عن نفسي والسبب هو المدارس اللي ارتادوها واجهزة الهاتف اللي صاروا يتحاورون بواسطتها مع كل من هب ودب.
انظروا كم حالة طلاق حصلت عقب العقد، كله بسبب أن الشاب والفتاة تحدثوا مع بعض واكتشفوا انهم unmatched!
سواءََ صدقوا أو كذبوا؟
أما بالنسبة لي ولجيلي فنحن تزوجنا بنات عاديات ما دورنا علي هذي التفاصيل وبعضهن كن مقصرات في الصلاة او لبسهم ما كان مثل اللبس الحشيم ومع ذلك تغيروا وصاروا هم مثال للتدين وللذرابة والحشمة وهذا بفضل الله اولاََ وبحسن العشرة والصبر من قبل الزوج (أو الزوجة اذا كان المقصر هو زوجها).
الحاصل موقف الوالد الواعي اليوم صعب
النظرة الشرعية مهمة جداً .. وايد ناس يرفضونها رغم شرعيتها ..
اعرف ثنتين انفصلوا عقب العقد لانهم اطلعوا للخاطب بالعبايه الوسيعة والشيله ..
الاولى تطلقت لانها وايد ضعيفه .. والثانيه اكتشف انها متينه وماجات على هواه ..
فالنظرة الشرعية مهمة وخاصه البنت لازم تكون على طبيعتها بدون مكياج وبلبس محتشم ..
تُنسى ، كأنَّكَ لم تَكُنْ ..
أنا ما اتفق مع اللي يبغي يركز علي سوالف دقيقة ويتمسك بصفات قابلة للتغير عقب الزواج!
النظرة الشرعية يرى الخاطب من البنت ما يرى منها عادة (وجه كفين قدمين)؟
بنيتنا المتينة ما تنعرف من استدارة وجهها؟ ومن جفوفها؟ والضعيفة نفس الشيء!
استغربت من أحد الزملاء الشباب يقول في احدى نقاشاتنا انه يبي يشوف شعرها؟
قلت له ربع ساعة سشوار تخلي شعرها ناعم؟ كيف بتعرف؟
قال لي لا، أعرف من أصول الشعر؟ بصراحه استغربت (شكثر يبي يدقق) و شكثر صار عند هالجيل جرأة ما هي محمودة..
واذا تبون رأيي (مع احترامي للجميع) هذي الجرأة اللي عند الشباب في غير محلها مع الأسف، وياليت الواحد يطالع نفسه ويطالع باخواته قبل لا يتشرط على الناس.
الرجل اللي نعرفه يترفع عن هذي الأمور، لكن بيجيك مية الف واحد يقولون حق من حقوقه..
ليش يظلمون البنات ويطلبون انهم يكونون على قدر عال من الجمال؟ ويلغون أو يتغاضون كل المعايير الأخرى؟ من بيطاوعهم لا شك غلطان وخسران.