خصوصاً اللي ذكرتهم إخوي عايش فرحان طبيب ومهندس وعسكري قادرين يستفيدون من مهنهم أقصى استفادة ومجال الشغل مفتوح لهم في أماكن ثانية بس يحتاج سعي وصج فيه ظلم وعراقيل وعدم تقدير من البعض للمهنة ومحاربة خوف من إن هذا القادم ياخذ منصب ويكون مسؤول عليهم
خصوصاً اللي ذكرتهم إخوي عايش فرحان طبيب ومهندس وعسكري قادرين يستفيدون من مهنهم أقصى استفادة ومجال الشغل مفتوح لهم في أماكن ثانية بس يحتاج سعي وصج فيه ظلم وعراقيل وعدم تقدير من البعض للمهنة ومحاربة خوف من إن هذا القادم ياخذ منصب ويكون مسؤول عليهم
هلا اخوي معماري
صحيح .. الدوام في البلدية او بعض الهيئات اسهل من غيره خصوصا ايام جيلي و جيلك .. الحين انتشرت سالفة البصمة و الحضور و صارت في بعض الاماكن اهم من الانتاجية !!
انا اقيس على طبيعة الدوام في شركات البترول في مسيعيد و راس لفان .. كثير من ايام الاسبوع ما نرد من الدوام الا بعد المغرب و احيانا ممكن نطول لين تسعة في الليل اذا فيه ضغط في العمل .. انا اتكلم عن ايام عمل عادية و ليست ايام الصيانة او الشفتات هذي موضوع ثاني ..
حتى الدكاترة دواماتهم طويلة و مب كل التخصصات تقدر تفتح لها عيادات خاصة خصوصا الجراحة
بالنسبة للبورصة .. ياما ناس خسروا اللي وراهم و جدامهم في البورصة و انا واحد منهم بسبب عدم الشفافية في السوق و القرارات الغريبة و غير المفهومة لادارات بعض الشركات .. ( الاجارة كمثال !! )
انا اعرف ان هناك وضائف اقل تطلباً و صعوبة من غيرها من حيث الدوام و لكنها تقل يوم بعد يوم و الوضع الان ليس كالوضع في الثمانينات و التسعينات و لا يمكن القياس عليه
و في النهاية مانقول غير الله يوفق الجميع و يبعد عنهم اهل الحسد و الانانية
التعديل الأخير تم بواسطة عايش فرحان ; 12-04-2022 الساعة 01:31 AM
صادق والله بعض الدوامات ابتزاز وإرهاق والله يعينكم وأوقات الرزق صعب ويعبونه أهل البلاد ومسؤوليها
سمو الأمير الوالد ما قصر في الكثيرين بعضهم ساعدهم بمشاريع وبنى سوق واقف حق أهل قطر وأي تقصير وسوء استغلال جاء من مسؤولين أدنى وسمو الأمير يتابع ويحاول بمكونات كثيرة منها الأراضي التجارية واللوجستية اللي توزعت وأنعشت شريحة كبيرة من المواطنين .. المشكلة المحتاج اللي ما حصل فرصته أو غايبة عنه الفرصة وهذي مشيئة الله أكيد ورزق العبد المقدر له
أعرف خريج محاسبة كان في البترول تقاعد وبدأ حياة جديدة الله يزيده نشاط وصحة وحيوية ولا يغير عليه الا للأفضل .. هذا قدم طلب لعزبة للإبل في الشحانية وحصلت له ودخل مجال كلش بعيد عنه سباقات الهجن وتوفق الحمد لله أقلها في شغل وقت فراغه .. وقدم على عزبة جوالة للمواشي وحصلت له في الرفاع وكانت عنده أرض في الصناعية سوى مشروع محددة أو حدادة بعبارة أصح .. عنده عقارات ورث له ولخوانه إشتغل عليها ورتبها وبنى جديد وأجر واستفاد هو واخوانه وسوى خير فيهم
ومثل ما قلت هذي أرزاق أوقات حركة بسيطة منك تعطيك خير والله يبارك لك وأوقات تسعي سعي وتتعب ولا تتوفق .. الوالد الله يغفر له يقول لي واحد فقير قبل يصيد سمك ويسبح قريب وغيره يروحون يغوصون للولو ويتعبون وهذا علقت في لحيته محارة حصل فيها دانة كبيرة باعها بوايد غالي وتحول لتاجر لولو وملك لنج للغوص وربطها بحبال قوية لكن هبت رياح قصت الحبال وغرقت اللنج وضاع حلاله وقال الدنيا يوم بغت تجي جابتها شعرة ويوم الله اراد يبعدها حبال غليظة ما مسكتها .. كان الله يرحمه ينظر لي نظرة فاشل بعد ما تركت الشغل قبل التقاعد وانا صغير وكنت أطمنه إن راتبي ينزل كامل وكان وإن عندي مبلغ زين في البورصة وذكرت له التفاصيل ورفع عينه متعجب مني ولا كنت أبالغ وأكذب كنت أقول الحق .. بعد وفاته تقاعدت رسمي والحمد لله توفقت أكثر وزاد رزقي ولله الحمد .. صحيح ما حصلت أرض في الصناعية ولا اللوجستية ولا أسواق الفرجان بس راضي كل الرضى عن رزقي
يازين سوالفك ياخوي الحبيب والغالي ابو عبدالله
الله يحفظ سمو الأمير الوالد اللي فعلا ما قصر مع أهل قطر مثل ما تفضلت ولا قصور في ابو حمد الله يحفظه
جميلة قصة راعي الدانة واللنج والجملة اللي قال لك إياها :
(( الدنيا يوم بغت تجي جابتها شعرة ويوم الله اراد يبعدها حبال غليظة ما مسكتها ))
كلام يُدَرّس ياخوي ، لا عَدِمناك يا ابو عبدالله وتسلم يمينك وذائقتك الجميلة .. مثلك
السلام عليكم ورحمة الله
نفس القصة كان يرددها جدي الله يرحمه ويرحم موتاكم وموتى المسلمين، مع بعض الاختلافات البسيطة
وكان يردد:
دنياك لين اقبلت بشعره تنقادي،،،، ولين ادبرت ما فادي،،،، سلاسل قطّعت
(على اساس ان المراكب او الخشب، في القصه، ربطت بالحبال والسلاسل وقت هبوب العاصفة او الدالوب لكيلا تغرق لكن ارادة الله فوق كل شي).
تحياتي للجميع ودمتم سالمين
التعديل الأخير تم بواسطة بوNasser ; 12-04-2022 الساعة 09:48 AM