المدن اللي صوب لوس أنجلوس كلها حلوة وقريبة .. سان دييغو تبعد حول ساعة بالسيارة وتعتمد على خطتكم للتنقل لو كل 3 ايام في مكان تمشي ولو تقعدون في مكان واحد مثل أنهايم بتكونون قريبين من كل هالمناطق خصوصاً عندكم سيارة .. إحنا سكننا في أنهايم في فندق قراند حياة وكان فندق راقي وكبير على مستوى .. كانت غرفتنا رقم 974 على كود قطر .. سويت غرفتين وحطيت صور للرحلة وكانت ممتعة

رحنا لاس فيغاس 3 أيام من لوس انجلوس حول 3 ساعات وبعد لاس فيغاس حلوة وبلاد حية وفنادقها كبيرة وراقية ورخيصة صج شوي حارة بس التكييف في كل مكان والمجمعات ملاصقة للفنادق

الرحلات الداخلية رخيصة بس بعض طياراتهم كشرة .. بعضهم على هندل هههه وضيق وكل شيء بمقابل حتى السندويشات والتأخير عادي .. لو حابين المغامرة روحوا بالسيارة لين نيويورك بس بتاخذون وقت طويل لكن بتستمتعون بمناظر مختلفة ومدن وقرى كثيرة في الطريق .. طيران من نيويورك لين سان فرانسيسكو ياخذ حول 5 الى 6 ساعات

وسان فرانسيسكو شوي بعيدة عن لوس أنجلوس يمكن 4 ساعات بالسيارة وحسب الزحمة والمدينة حلوة فيها مطاعم ايرانية وفيها الجسر المعلق قولدن قيت وشوي أبرد

نيويورك غالية وزحمة ومع الحر عذاب ما حبيتها بس الأهل للتسوق عادي لو يقعدون شهر ما يملون .. إحنا جربنا طيران النورثوست من تامبا لين نيويورك ساعتين ونص وكانت الرحلة والتذاكر رخيصة خذتها من سفريات كانت في قاعدة جوية كنت اداوم فيها

كنا من أناهيم نوصل أي مكان بسهولة لأننا نطلع عكس الزحمة وفي أوقات غير الذروة .. سان دييغو حبيتها هادية والمكسيكيين وايد لتفوتون تسكنون فيها كم يوم انا رحت نص يوم بس والتنقل من فندق لفندق شيء مزعج لكن لسان دييغو يستاهل وأكيد لسان فرانسيسكو أما مناطق لوس أنجلوس كلها متقاربة .. ايرفاين حلوة لو تحصلون فيها سكن وبتقدرون توصلون كل مناطق لوس أنجلوس .. لاس فيغاس تستاهل يومين أو ثلاثة ونيويورك حسب رغبتكم انا لو ودي ما رجعت لها لكن أكيد جهة نياغرا فولز وهي تبعد حول 6 ساعات بالسيارة عن وسط المدينة اتوقع حلوة وللأسف ما رحناها

10 أيام بين نيويورك ونياغرا فولز بتكون كافية وزود

ولو حابين تروحون صوب اورلاندو بعد ضبطوا اسبوع هناك وايد حلوة وبتستانسون جدولكم بيكون مليان ديزني هناك أكبر بوايد وفيها فعاليات أكثر من لوس أنجلوس