ثانيا: تصميم البيت وحجمه..
يجب مراعاة ان يكون تصميم البيت بسيط غير معقد ..
لاحظنا ان في بيوت لما تدخل تحس انها كثيرة الاعمدة او كثيرة الاقواس وصار يفقد لمسة الفن فيه يوما بعد يوم لان هالاشياء تكون موضة لفترة زمنية ثم تنتهي..
او انه وقت تنفيذها على ارض الواقع تظهر بشكل غير المتوقع مما يعطل البناء ويضيف تكاليف اضافية لاعادة الرسم والتخطيط واعادة صياغة عقد المقاول وقيمته ويفتح باب لخلافات كثيرة بين المقاول وصاحب البيت..
ايضا يجب مراعاة ان يكون حجم البيت معقول لا كبير ولا صغير لان الكبير يكلف كثير وشفنا ناس بنوا بيوت كبيرة جدا مساحة الدور الواحد حول 450 متر وقفوا البناء في المنتصف لانه لم يستطع تحمل التكاليف الاضافية ..
اختيار شركة تصميم البيت تلعب دور محوري هنا حيث انه تكون حساباته دقيقة جدا لحجم العمدان والجسور والحديد والصبيات..
ممكن يكون تكلفة عمل الخريطة عشرين الف ولكنه افضل من اللي يسوي خريطة بعشرة الاف وتطلع غلط..
تكلمت مع اكثر من شخص عن هالموضوع صار معاهم ان المقاول بالغ في احجام العمدان والجسور وحجم الحديد لما جا يبني طلع عليه سعر المتر عظم حول 950 ريال بينما البيوت الثانية في نفس الفترة الزمنية كانت 850 ريال..
تصدق قطرمان لو يرجع فيني الزمن كنت عدلت خريطه البيت كلها ..
خاصه بمكان المجلس الخارجي ومدخل الباب .. يالله الحمدلله على كل حال ..
واصل نقاطك يااخوي ..
تُنسى ، كأنَّكَ لم تَكُنْ ..
لو تعديل بسيط مو مشكلة لان الانسان دائما يرسم صورة بيته بمخيلته ويحاول يقرب لها قد ما يقدر..
انا اتكلم عن اللي يغيرون تغيير جوهري..
يعني في احد المرات دشيت بيت في احدى مناطق الدوحة معروض للبيع وكان مساحة الارض حول الف وميتين ومساحة البناء فيه كل دور حول اربعمية..
كان راعيه مشطبه واستلم مفتاحه واليوم الثاني عرضه للبيع..!!
طيب ليش قال لي صاحب البيت ما عجبه ..!!
يعني حرام والله كل هالتعب وفي الاخير ماعجبه..
تبين ماي نصيحة
إبعدي عن القطري في البلاط الا لو بتحطينه مخفي تحت زولية والسبب يصنعونه ببقايا بناء ومخلفات ( بودرة ) والبودرة كلها شوائب .. يتشرب ماي وشكله يتغير ويتفتت بدون سابق انذار .. إشتري تركي أو ايراني منشأ هناك أفضل وهالنصيحة نصحتها واحد مسوي مجلس وليوانه كبير وتغير بسرعة والعتبات تفتفتت أطرافها
الفرق 100 ريال في المتر اضربها في 1000 متر مثلاً تطلع 100000 .. انا دوم نصيحتي شوف البدائل الارخص والأفضل تحمل حتى لو شكلها شوي أقل درجة من غيرها .. نوازن دوم حتى نحصل على شيء مناسب .. وما نسترخص الاستشارات الجيدة حتى لو كلفتنا 50000 وحولها .. لو بادفع 10000 وباخسر بسببها 100000 وفوقها غير أخطاء ووجع قلب أحسن لي أدفع 50000 أو حتى 100000 وأحصل شغل مضمون ومدروس صح وبدون وجع راس