عندي سؤال ؟؟؟؟
يمكن البعض يقول اني مبالغ في الموضوع ؟؟
الحين يوم يسون اختبار العزل المائي . يحطون كميات هائلة من الماى تقريبا من 4000 الى 6000 جالون يختلف من منزل لمنزل على حسب المساحة . بعد الاختبار ينزل الماى من فتحات السطح لارتدادت الجانبية او الخلفية . هنا السؤال : الماى هذا بالكميات الهائلة ماراح يأثر على القواعد البيت وقواعد السور ؟؟؟؟ يعني ممكن مثلا يسوي هبوط ؟؟
شوف اخوي سعود البيت بعد فترة من الزمن سنة أو سنتين راح يريح ويصر هبوط غير ملاحظ
وهذا الشي طبيعي
انا عندي البيت في جهة الملحق صار عندي هبوط وبما ان مظلة المحلق لاصقة بالبيت
حائط البيت شوي تاثر
بس الحمدالله انا لين الحين مابلط وإلا صبغت
وصارت عندي بعض الشلوخ في بعض الحوائط وتم معالجتها
بالنسبة الماي راح يتبخر بسبب أشعة الشمس وانا في نظري خله لين يتبخر صحيح بياخذ وقت شوي لان الجو معتدل هالأيام بس خله يعتبر فترة اختبار للعازل لين ينشف
وواخوي معماري ماراح يقصر معاك بالنصح
التعديل الأخير تم بواسطة Azizuk ; 21-11-2016 الساعة 12:48 PM
من ترتيبات الحوش نعمل حماية للجوانب ونسوي سلوب حتى نبعد الماء عن البنيان .. ولو نسوي نعلة حماية للحائط أفضل بكثير
المشاركة الأصلية كتبت بواسطة معماري قطري
اخوي معماري قطري شفت المادة اللي تنصبغ فيها عمدان والجسور يجي لونها بيج هذي ممتازة للعزل واتوقع حق دار مادار البيت لو تنصبغ الحيطان الارضيّة قبل دفان الحوش للبيت ماتكلف
أشوفهم حالياً يصبغون فيها جسر بوهامور اللي عند مدرسة الجزيرة وجسر المترو على طريق الوكرة احس انها طبقه عادة وممتازة
سالت عنها عند محلات جوتن ينباع الدرام ب 600 ريال وأحس ان يكفي درام واحد للبيت
ولو ادري عنها قبل كان صبغت فيها اساسات وقواعد البيت بعد البتومين
التعديل الأخير تم بواسطة Azizuk ; 30-12-2016 الساعة 05:35 PM
انا تذكرته بعد ما صبغت .. هو زين لحدود نص متر تحت حتى يتحمل رطوبة الأرض .. إسمه ايبوكسي .. البتومين يختلف للي تحت التربة والايبوكسي للي فوق بشوي والحوائط القريبة من الزراعة والماء
بعدين وين هالغيبة كله مسجل غياب
موجود طال عمرك وعمر السامعين
بس ماعندي شي أشارك في
الايبوكسي للي عنده انترلوك ومب عاجبه يشتري ويصب عليه صب ويوزعه بمكنسة ربر ولين نشف يكون مثل أرضيات المغاسل .. بس تحت الأرض ويندفن والله ما ادري ممكن تسئل عنه ويمكن البتومين يطلع أحسن والبيتومين أنواع كثيرة بعضها غالي بعد وقوي
اخواني سعود وبوسعود الأساسات لازم تبنى على أرض صلبة والدفان يوصل أوقات لمتر ونص الى مترين فوقها والمفروض رطوبة بسيطة توصلها ما تؤثر خصوصاً لو كانت توها مبنية ما لها فترة
بعد انتهاء البنيان ضروري نستعجل في عمل ترتيبات الحوش ولازم مخططين شنسوي من قبل .. يعني مكان الزراعة محفور له ومحمي بطابوق من الأطراف وعزل عن المياه لا تطلع وعن جذور الشجر لتوصل للأساسات .. نبعد أحواض الزراعة بحدود متر وزيادة .. مع اني مغامر وبعض الأماكن تقريباً فوق الأساسات والحمد لله ما حصل شيء
حتى الحفر كان مقرر مترين ووقفتهم بعض الأماكن متر وبعضها مترين وشوي حسب ضعف الأرض لين وصلنا لين طبقة صخرية قوية
استشاريينا يبالغون في الخرسانات كلهم وخصوصاً الأساسات وتعودنا نسمع من بعضهم الأرض ريحت وهو سوء اشراف عنده بس يبرر .. المبالغة في الحفر أوقات تضيع منك طبقة صخرية قوية وتحتها تكون الأرض ضعيفة وتدخل في مشكلة كبيرة أما تبني على أرض ضعيفة أو تقوي الأرض بمواد اسمنتية أو تغير نوعية الأساسات وتسوي دراسة مختصة لنوع ثاني
دخلت مرة بيت فيه شلوخ قوية يبين الطابوق مثل المدرج مع الشلخ .. وقلت للمالك شغل الطابوق غلط وبدون مونة كفاية .. طلعت معاه برا رحت ورا البيت والبيت دور أرضي بس مب ذاك الوزن عليه حصلت شلخ بسيط في الزاوية قرب الأرض .. كانت وقتها الركبة قوية رفست المكان الا متكسرة خرسانة العمود وطالع الحديد نازل بس مفصول عن حديد القاعدة .. قال لي المالك المهندس يقول الأرض ريحت قلت له جيبه وراوه مكان الزاوية ذي وقول له سوء الشغل واضح
اللي يشوف حواليه ويعرف ناس قربه بنوا ولا صارت لهم مشاكل مع شلوخ ومثل ما يقولون ريحت الأرض وبيته بس اللي فيه هذي المشاكل يعرف إن فيه خلل في الشغل .. المفروض المقاول يصلح حتى لو مب مكتوب في العقد لكن قوانينا ركيكة ومقيدة ولا تنفع الا المقاول
جزاكم الله كل خير
وشكرآ
الله يجزيك بما دعيت
لكل وضع تفصيل جيد .. بيت بدون بيسمنت تحتاط بإبعاد الماء عن الأساسات حتى ليخرب الحديد .. وبيت مع بيسمنت وضعه شوي أصعب ولازم تسوي تصريف تحت وبمضخة .. إحتياط لو ارتفعت المياه الجوفية واحتياط لأي رطوبة تنزل قرب الحائط الخارجي وتنزل للجدران الجانبية تحت الأرض وتلتصق فيها وتتسرب لها وللداخل .. حتى العازل ما ينفع وتنتهي صلاحيته ونستعمل أما فراغ كامل يخلي الماء ينزل بدون عائق ويوصل لمصيدة عبارة عن فتحات بانسياب تجبر الماء للاتجاه لها ولبايبات تجمع الماء في منهول أو اثنين وثم ترفعه مضخة لحفرة تجمع بعيدة أو للصرف الصحي أو تفرغه في الزراعة
ممكن الفراغ هذا يبقى مفتوح كبلكونة سفلية لو عندك مساحة وتكون عندك نوافذ وأبواب وزراعة خارجية واستفدت من الفراغ معمارياً .. وممكن تسويه ضيق جداً وتملاه بالحجارة الصغيرة ( كنكري ) وفوق تقدر تركب بلاط حيب ما تحب .. تحت الكنكري يجي بايب التصريف وحطيت له مقاطع فيديو في يوتيوبيات البناء
للبنيان العادي زين قبل لنحط دفان حول البيت من الخارج نحط بلاستيك سميك .. البلاستيك عادي ويمكن 100 ريال تكفي حق تشتري لحول البيت كله وهذا يبعد أي رطوبة متسربة عن الحائط والجدران .. تدفن فوقه وتركب البلاط بسلوب بعد جهة الخارج وبعيد عن الجدران
ضوابط المشاركة
رد مع اقتباس