السلام عليكم ،،

بداية أحي جميع القائمين على معرض مال أول - بغض النظر عن البوق والنصب اللي ف الاكشاك اللي صاير هناك - ماقصرتوا احييتو تراثنا ووسعتو صدور امهاتنا وابهاتنا .

أول أمس رحت المعرض ودخلت (السوق) - دايركت ع كشك الذهب (مانتبهت لاسمه وياليت تعطوني اسمه ضروري لاني ماقدر اروح مرة ثانية لبعد المسافة)

عجبتني اسوارة عبارة عن لولو وفيها 4 حبات ذهب . سألته بكم ؟
طبعاً بدون مايوزنها ولا شي واقسم بالله العظيم خذ الكالكيوليتر (الآلة الحاسبة) قال ب 5400 ريال بعد الخصم 1100 خذيها بألف !
حسيته غشاش وقلت خل اروح سوق الذهب اضمن
أمس رحت سوق الذهب ولقيتها هناك ف كللللللل المحلات تقريباً وكل محل دخلته نفسسسسسسسس السعر :


250 ريال !

سألته ليش (قال ماما هذا سوارة مافي ذهب واجد)

والذهب يبقى ذهب ماظن في ذهب اوروبي وذهب امريكي ولا موزمبيقي !

الاسواره هي نفسها ف المعرض ونفسها ف سوق الذهب !

يقول ب 5400 ليش ؟؟؟؟؟ وشلون من 5400 تنزل لين ألف ريال ؟

قسم بالله حرام راعي المحل شلون يرضى ع نفسه ينهب الناس بهالطريقة ؟

المهم انا ابي اقدم شكوى ولكن احتاج اسم الكشك في حد يعرف اسمه ؟

ونقطه حابة اوضحها : ادري في ناس بتجي بتقول يمكن الاسوارة غير او الذهب فيها اكثر واقسم بالله ماكذب عيني ولا اظلم بختي الاساورة نفسها نفس اللون وعدد الذهب .
بدور صورتها وبحطها ولو مالقيت بصور اللي شريتهم وبنزل الصورة .