هل يوجد قانوني في المنتدى

[سلامي للكل]

وعليكم الســلام ورحمــة الله وبركاته اختي

حالياً مايهمنا ايش العقوبة

هذي الفئات من الناس تستحق ان الواحد يشتكي عليها ويجرجرها في المراكز

اختي الاخوان ماقصروا , تروحين مركز العاصمة وتقدمين شكوى وتقولين لهم الي صار بالضبط

صدقيني صدقيني صدقيني بيندم على كل كلمة قالها لج

وبعدين لج الحرية في التنازل بس اهم شي انج تجرجرينه وتبهدلين (العين بالعين , , , )

توكلي على الله وفي انتظار الرد الشافي منج (بانج رحتي وقدمتي الشكوى)

وبالتوفيــق

[بوعلاوي]

نفس الموقف صادفني مع واحد الله يهديه لف علي فجاه وهرنت له .. الاخ ما عجبه ليش اهرن .. لحقني ويلف يمين ويسار ويكبس ويستعرض ههههههههههههه وانا ماشي عادي مب مهتم فيه ولا خايف منه

[المحاميه]

زين إن عندج رقم سيارته
روحي قدمي شكوى ضده

طبعا لج حق لأن هو الغلطان والمتهجم عليج بالقذف والسب وهذي جريمه يعاقب عليها القانون

بس حركة هالشخص الصراحه مادري شلون - يعني شلون يحول حق حرمه ويتلفظ بهالألفاظ؟
شكله ماكان ف وعيه

بس أختي لاتسكتين عن حقج روحي قدمي بلاغ وقوليلنا شصار

[المحاميه]

العقوبه هي الحبس بس غالبا يطلعون بكفإله
وغرامه

بس ملفه بيستوي أسود

[بو خليفه 123]

العاصمه او النيابه ليست الجهة المعنيه بالأمر .

الشكوى مروريه (حصلت بالشارع) لذلك تقدمين بلاغ في مرور المعموره و من هناك يطلبونه و ياخذون اقواله و من ثم تحول للنيابه اذا اقر الشكوى .

[لاجئ عاطفي]

الموضوع قذف وسب ماله خص في المرور الشكوى في قسم الشرطه ومن ثم تتحول للنيابه ومن ثم للقضاء

[المهاجر]

السلام عليكم ورحمة الله وبركاته

يعطيكم العافيه على ابداء الرأي

بخصوص الموضوع فهو ينقسم لشقين

شق جنائي وشق مروري

الشق الجنائي فيما يتعلق بالسب فهذا من اختصاص مركز الشرطه الذي وقع في دائرته

بمعنى اذا المكان بالريان تكون ادارة أمن الريان هي المختصه وهكذا

الشق المروري فيما يتعلق يقيادة مركبه برعونه وعدم احتراز وهذا من اختصاص المرور ونفس الشي الشكوى تقدم حسب المكان

لكن طالما الموضوع مرتبط ببعضه فعليج تقديم شكوى لدى الاداره الامنيه (مركز الشرطه ) اللي وقعدت فيه الحادثه

وهم بدورهم بيستدعون الشخص وبيتم تدوين اقواله ومن ثم احالة الملف للنيابه العامه للتصرف فيه

والنيابه بدورها بتتخذ اللازم واذا رأت فصل الموضوع بتوجه بفصله واحالة الشق المروري لإدارة المرور

اختي حطي في بالج ان من حقج تقديم الشكوى خلال 30 يوم من حدوث الواقعه وبعد مرور هالمده يسقط حقج اذا ما قدمتي الشكوى

كما يجوز لج التنازل عن الشكوى في اي وقت اذا رغبتي بذلك


ملاحظه اخوي شبح

يجوز تقديم الشكوى للنيابه العامه مباشره فهي صاحبة الاختصاص وبدورها تتخذ اللازم اما باحالة الاوراق لمركز الشرطه المختص

لاستدعاء الاطراف وتدوين اقوالهم او تقوم هي بالتحقيق بالموضوع مباشره

[Master_qtr]

سؤال ! لو انكر التهمة وقال انا ماسبيت؟ ايش الاجراء؟

[لاجئ عاطفي]

في شهود معاها ماظن راح يقدر ينكر

[كشافات بيجو]

قدمت الشكوى ومازلت في انتظار استجوابه في امن العاصمه . وعندي شهوود اليهال والخدامتين والوالده واكبر عيالي عمره 8 سنين ومازال يسال عن السبات اش معناها .وما انمسح الموقف من ذاكرته .