إخواني وأخواتي الأعزاء

في هذا الموضوع حاب أنقل لكم تجربة بنيان حوض سباحة مغلق، حيث كانت الفكرة موجودة ومخطط للمكان منذ إنشاء البيت، وقد تركت الأرضية الخلفية بدون دفان، حتى يكون الحفر أقل ما يمكن.

وتم توقيع العقد واقتراح مواصفات الحوض مع شركة تدمر، وكانت فترة الإنشاء لن تتعدى 3 أشهر إذا أنا أكملت متطلبات العمل الخاصة بي، وهي أعمال الحفر والردم وبناء غرفة المعدات، بالإضافة إلى نيتي عمل سقف منفذ لنور الشمس وتكييف وبناء جلسة جانبية وتكرمون حمام.

المهم صورت الموقع قبل بس ما حصلت الصور الا اللي في بداية الحفر، وحظي زين كان إن عندي مساحة الحفار بمساحة الحوض وزيادة شوي للطابوق في حدود 8 في 5 متر يعني وكانت عندي قطعه فاضية باحط الدفان فيها، وباخليكم مع صور التكسير والخربطه وباكمل بعدها




وهذي الصورتين لعمق الحفر بعد ما بدينا بسرعة بنزع البلاط ورصه في الأرضية اللي ناوي أدفنها علشان أسويها بأرضية صالة البيت.

وهذي المساحة محصورة بحوايط البيت الخارجية واللي نويت أرفعها أكثر، وهذي صور لمدخل الصالة الخلفي اللي جهزته قبل علشان يطل على الحوض.



وهذي صورة لتكسير الدرج علشان المساحة تكفي لحاجز الطابوق.



وهذي الأُمور كلها حتى الإتفاق على سعر محدد مع المقاول صعب، والمقاول باكستاني طيب وعلاقتي معاه قديمة وعارف انه بياخذ حقه وبس، وهذي بعد صور غير لتطور الشغل.



هذي منطقة الجلسة وهي بمساحة 6متر ونص في عرض 3.14 متر، وكانت الخطة إني أخلي سقفها بإرتفاع عادي وسقف الحوض بارتفاع دورين ومفتوحين على بعض، وتبين هنيه فتحة بايب صرف ماي المطر اللي نزلناها لتحت مستوى بلاط الغرفة وسوينا لها فتحة على الخارج في الحايط الخارجي.



أعتقد هذا يكفي اليوم وإن شاء الله نواصل بكره.