عقد سبّاكه ! نصايحكم

[مضارب دوسري]

السلام عليكم
انا حاليا ارتب عقد للبايب فيتر
وتم ذكر المواصفات فيه
مثل بي بي ار الماني
وبايبات للصرف الصحي بحرينيه
وسخان مركزي

ياليت احد يقولي بعض النصايح عشان احطها كشروط
اول شي
ابي اعرف التيستنغ كم بار المفروض يكون ؟
والله يجزاكم خير مقدما وشكرا

[مضارب دوسري]

للرفع لان ابي اخلص تفاصيل العقد اليوم

[(محمد)]

ربي يوفقك اخوي مضارب

[ZURICH]

اي شي متعلق بالماء في البيت مهم و السباكة من اهم الخطوات في البيت .

ركزعلى المقاس المناسب للبايبات الداخلية والخارجية

خاصة اللي طالعة من الخزان الرئيسي وبايبات الصرف

وخذ فكرة عن القطع اللي تمنع الروائح ( الرداد ) في الحمامات

وفي خطوة قليل يسونها في قطر .. وضع خرسانة او خلطة اسمنت مع طابوق

تحت بايات الصرف كل مترين في الحوش عشان مايهبط مع الوقت

ومن رأيي .. إسأل بايب فيتر أفضل لك ونصيحة لاتتعامل مع البنغال

[المقاول]

يالدوسري
ليش بي بي ار ليش ما يكون نحاس؟ الفرق بسيط والنحاس افضل
واعزل كل مواصير التغذية ... والسباك خلية يشتغل حسب الخريطة.
السباكين يشتغلون على كيفهم .. وحاول تكون المتريال من اجود شي
في السوق ... وقد ماتقدر تحرص حرص ... ونتمنى لك التوفيق....

[مضارب دوسري]

النحاس ماينفع للبريشر
انا سالت كذا شخص ركبوا بريشر على النحاس وصارت لهم معاناه ماتخلصوا منها الا عقب ما شالوا البريشر

[مضارب دوسري]

يعطيك العافيه يا حوران
كنت على وشك التوقيع مع هندي ولكن اكتشفت انه لاناقة له ولا جمل في السباكه وهونت عن التوقيع معاه

[ولد المنصور]

اخوي العزيز ... في اشياء بسيطه اذا ودك اتحطها ,,, الشطاف خله يحطلك الحار والبارد ,,,, المحابس خلها يحطها خلف الباب وتحت .... وعندك فتحه الصرف خلها يحطها في زاويه احسن من النص .... وبيبات الماي اللي في السطح لو يحطها على سور الوارش دار مادار من داخل طبعا عشان ماتعرض للشمس مباشره وانظف وموفق ياخوي ....

[مضارب دوسري]

بيض الله وجهك يا ولد المنصور ملاحضات في محلها ربي يجزيك خير

[ولد المنصور]

ويجزيك الخير يارب واذا بغيت شطافات عجيبه وشكلها حلو,,,, مافيه الا نكست للمشاريع ولازم تاخذهم قبل البلاستر لان فيه قطعه يثبتها قبل حق الشطاف ,,, والمحل في طريق سلوى قبل معرض المالكي والشارقه بكم محل ... واذا بغيت اتشوفهم عندي حيااااك الله في اي وقت ...