ماهي الاشجار المثمره التي تزرع في الخليج

[Chambray]

اختي شنهو التون؟؟

خطأ مطبعي

والصحيح ( التوت )*

[روح الاطلس]

احب الزراعه وايد

احب اشجار الورد

احب العناية فيها

واحب الحدائق

بس للاسف ماعندنا مساحة وافية للزرع وامي حاولت تزرع شجرة ليمون خذناها شتلة صغيرونه وايد ولها الحين يمكن ثلاث او اربع سنين توها تزهر بس مدري هل هو موسم ليمون اخضر الحين او لا !! وحاولت تزرع منجا طبعا مانجحت .. وبرتقال توهم شتلات واممممم نعناع ناجح جداً وريحان ناجح .. وزارعه شجرة كيوي ^_^ اقولها يمه كيوي قطري ماعمري شفت .. طالت شجرة الكيوي بس اشوفها بدت تميل ..والطماطم سهل وايد والبطاطس سهلين وايد والشمام بس مانجح .. طبعا على البركة بلا عناية ولا شي ماغير ماي وبس

اللي نجحوا بزراعه صنف معين ياليت يفيدونا بكيفية العناية وشلون تختارون الشتلة .. فرضا رحت اشتري شتلات كيف اعرف هي ذكر او انثى *_* لان اللي اعرفه الذكر ماتنتج

ومن وين ناخذ سماد وفيتامينات وهالشغلات

فيه شجرة ورد خاطري ازرعها اللي دايما نشوفها بالشارع بس ماعرف اسمها يكون عودها ناعم وفيها وردات بيضا واحيانا وردية

موضوعك نايس تشكر عليه

[lacigale]

" موضوع مفيد بصراحه .. يعطيكم العافيه على الطرح

[تحداني]

اختي شنهو التون؟؟

خطأ مطبعي

والصحيح ( التوت )*

بارك الله فيكم .. بالفعل خطأ مطبعي
خلونا اشوي ندخل في تفاصيل التفاصيل وحكايه حديقتنا .. عشان نقدر نعطي هالموضوع الجميل حقه


مثل ما ذكرت ان الوالد يحب الزرع .. وعشان اقدر اجاوب وافيد اختي روح الاطلس بوايد اسئله اطرحتها سالت الوالد وكان رده ..

" شجره الليمون " تحتاج وقت طويل عشان تكبر وتثمر تتكلمين عن سنوات طويله فقام الوالد بعد ما انتهى من بناء الفلا بزراعه الليمون اختار نوع الليمون وثمارها من حديقه واحد من اهلنا .. واكبرت وايد بعد سنوات وصارت مثمره

مشكله شجره الليمون تكبر وايد مع العمر وتصير جذورها عميقه .. وتميل تدريجيا وهذا الي حصل مالت الشجره وحاول الوالد يحط لها اخشبه كبيره عشان تثبت .. ومع الزراع كل بعد فتره يقص اغصان عشان يصغر حجمها

ما شاء الله تبارك الرحمن ثمارها حلوه
وانوزعها على بيت الجيران .. وانقوم انثلج العصير نفسه


الورد " هذا اختي روح الاطلس عباره عن مواسم معينه
اتروحين المشاتل وتختارين الي تبينه .. زراعتها عاديه جدا .. ونسبه الماء عاديه
بس ما راح تعيش مده طويله الا تموت ..

بس في ورود مثل " الفل والياسمين .. والورد المحمدي " تبقى جذوره
بعد ما اتزهر الا ابموسم

" عندج المشموم " هم يعيش في معظم المواسم
بس عندنا جزء من المشموم في البيت عليه نقط سوداء .. اعتقد صارت الشجره مريضه
وجاها شي الوالد حاول مع هالجزء بس شاف ان يقتلعها افضل من تواجدها لان ممكن تضر البقيه

النخيل نعم محتاجه انثى واذا عندج ذكر اتلقحينه بأنثى وهذا الوالد يسويه كل سنه عن طريق واحد " بتاني " يدور على الابيوت وخذ رقمه .. ويجينا ابمواسم
وعندنا هم مثل ما ذكرت انواع من النخل والوان مختلفه
والعنايه فيها عاديه .. تسقينه ماي اشوي .. كل يومين او ثلاث واوقات عادي لو اطولين فيها لان النخل ممكن يعيش في اي ضروف

نجي " للورقيات " الخس .. والريحان .. البقدونس .. الجرجير هاذي زراعتها عاديه وتعيش
تاخذين بذورها من المشاتل .. او اتخلين الزراعيين يجيبونه لج ..
عادي تحفرين واتحطين البذور وانتهى الموضوع
نسبه الماء الوالد يقدرها .. ويعرف لها نتيجه الممارسه وحبه لهالهوايه
بس اهم شي الطيور والعصافير ما اتجيها لان الوالد متعقد منهم
احيانا ياكلون البذور قبل لا تنبت .. واحيانا يخربون له الدنيا وتسمعين صوت اصراخ الوالد في الحوش
يعني شي من الزرع خربه العصفور



" التوت " كان عندنا بس العصافير بهدلوا الدنيا .. وامي كل يوم مع الخدامات اهواش تعالوا اغسلوا البيت .. حقيقه ملوا من التنظيف .. غير اعيال الجيران ما ايفارقون الاشيره عادي هني وعافيه بس يفعلون حصى وكل انواع الاسلحه يجيبونها .. والطوفه والصبع كله صار احمر عنابي .. واوقات الظهر اذا شافوا الباب مفتوح يدخلون الحوش .. ويدوسون على الحشيش والورد والخس وامي اتعصب لا تقدر اتهاوشهم ولا تقدر تمنعهم ..


" التين " عاش فتره طوووويله وايد .. وحقيقه كان مثمر للغايه
" عندنا رمان " بس مشكله الرمان .. ان يثمر ما اقول لج ما يثمر
بس مب حلو واكبر حجم ممكن يوصل له هو حجم " الافندي الصنطره " وناشف من الداخل


بعد ايش مممممممم
تذكرت " كنار " عندنا شجره الاكنار .. بس اوراق الشجره مزعجه .. صار عندنا خريف يومي
جاري قطعها


عموما .. العنايه بالزراعه تحتاج زراع شاطر مهما الشخص عنده خبره
ومحتاج عنايه .. ومحتاج وقت .. ومحتاج ادويه .. وسماد وفيتامينات .. كل هالاشيا متوفره في المشاتل مب صعبه .. وممكن يعلمونج حتى طريقتها والوالد يعرف لها

بس المشكله الكبيره " العصافير .. الشمس القويه .. والامراض " ممكن تتعرض الاشجار لأمراض وهنا التخلص منها متعب



جملكم الله برضاه

[تحداني]

حديقه البيت .. معتنين فيها وايد .. بس ما تطلع لنا بالطريقه الي انشوفها في الحدائق الكبيره
او الحدائق العامه .. او في صور المجلات

ليش ؟؟
لان ضروف البيت مختلفه عن ضروف الاماكن الشاسعه


ان شاء الله قريب جدا اذا حابين تشوفون الصور بحطها لكم
اذا كان يخدم الموضوع .. واذا عادي نتركها



جملكم الله برضاه

[روح الاطلس]

هع تحداني مب على كيفج ماتصورين نبي اصور وايد وايد وايد هااااااااااالكثر اذا ماعليج امر ولا كلافه

وايد افادني ردج ان شاء الله ببيتنا اليديد اول شي بكلم قطر خضراء يصممون لي حديقة وعقب بزرعها واهتم فيها

وربي يخلي لكم الوالد ويطول بعمره يارب

تدرين ان الزراعه فيها أجر عظيم لحديث من كان في يده غرسة شجر وقامت الساعة فليغرسها

بالنسبة للرمان في اعضاء يقولون يطلع لهم وانتاجه ممتاز يمكن يبي له عنايه خاصه ماعرفتوا لها

بانتظار رجوعج للموضوع يا سكرة

[تحداني]

حبيبتي روح الأطلس
ابشري بالصور .. عطيني وقت وراح اتشوفينها متصدره
بس اخاف بعد ما احط الصور بعد يقولون لي شي ... او يفسرونها ما ادري اشلون
صرت اخاف من موضوع الصور وايد .. احتمال ارسلها لج على الخاص ..

الرمان والله ما ادري عنه
بسأل الوالد مره ثانيه .. وبتأكد ليش هو جذي


الله يآجر الوالد والوالده
ويقولون لنا بعد ابوي وامي لا اتزخون الاشيره في الليل
ولا اتقصون وتقطفون شي منها مب زين
ومن احنه اصغار ماشين عليها ما ادري هالشي ليش ؟؟
وهل هو في مضره ولا لا ؟؟



الله يرزقكم يارب ابيت اكبيرررررررررررر في الدنيا هاااااالكبر
وايبصر من قصور الجنه قولي آمين

انا سكر
انتي عسل

والعسل على فكره تلقينه وايد في شجره الليمون
اذا الوالد ما عصره راح احط لج صورته بعد


جملك الله برضاه

[روح الاطلس]

عسل في شجرة الليمون! شلون من وين وكيف وليش اول مرة اسمع به


وبعدين ليه تحاتين الصور وايد حبوبتي اشفيها صور الشجر والفواكه ماعليج من اللي يحبون بس ينقدون انتي تدرين هالعالم عقولهم مدري شلون صايره على الطالع والنازل انتقاد

بخصوص لاتقربون صوب الشجر في الليل هاي اعتقادات انها بيوت للشياطين كنت اسمع هالكلام وانا صغيره مثلج الشجر والجبال والبحر بيوت ومساكن للجن والعلم عند الله لكن الواحد يتحصن بالمعوذات ويتوكل على الله

[khaldoon]

السلام عليكم و رحمة الله و بركاته

موضوع مميز و جديد على الساحة في هذا القسم

لو بغيتوا شجيرات و شتلات تعمر و جميله و شغل ديكورات بس مب مثمرة انا مستعد ادلي بدلوي حسب خبرتي المتواضعه في هذا المجال

خاصة الشجيرات الصغيره اللي هي shrubs

اما الاشجار غير المثمره بس حلوه...يمكن اقدر اساعد

مع اني زعلان من راعي الموضوع خخخخخخ بس يالله ما نقدر نخبي اي شي نعرفه عن الاعضاء الحلوين

[روح الاطلس]

بشمهندسنا حياك ادلي بدلوك وياليت مع الصور مافي اجمل من اللون الاخضر يحبه العين

بس احنا طماعين

نبي كل شي بالتفصيل والانواع وكيفية العناية واهم شي شلون اختار الشتلات وحجمها