السلام عليكم و رحمة الله وبركاته


امس مريت على مطعم ( مشويات انطاكيا ) في ازغوى و قلت بمر اخذ عشا ,, طلبت 2 شوارما دجاج و يوم خلص و وصلني العامل عطيته 10 ريال ( كـ العادة ) لاني اعرف الاسعار قالي محمد الحساب 12 ريال ؟!

طبعا انا استغربت و ناديت مدير المحل و كلمته .. قلت له من متى الشوارما بـ 6 ريال انا قبلها بيوم ماخذها منكم بـ 5 ريال .. متى لحقتوا ترفعون السعر .. قالي الاجارات غالية و موظفين و ما فيه زباين و الدجاج صار غالي ( طبعا السالفة المعروفه ) كل اهل قطر يسمعون هالكلام بشكل يومي من اصحاب المحلات و العاملين فيها ., وفي الاخير تفاجئة يوم قالي فيه محل اسمه شوارما اكسبريس في الغرافة يبيع الشوارما بـ 13 ريال و وان الشوارما الي هو يسويها احسن منه و الناس تشهد له ؟! ( المسألة مسئلة غيره يعني )

الحين هو لو بيقارن ترى اجار محلات الغرافة من 20 الف ريال و انت طالع وهو اجارة على كلامة 6 الاف ريال .. واذا على النظافة و الخدمة و الجودة فما تتقارن بينهم .. يعني على اي اساس رفع السعر ؟!

والله يا جماعة ما فرقت معاي ريال ولا ريالين بس اذا صكتنا الحين بيتمون يزيدون و يزيدون و يزيدون الين توصل الى 20 ريال و اكثر ما حرني يوم قال انه عرض المينيو على الوزارة و وافقت عليه ؟!

ابي اسئل اي وزارة وافقت عليه ؟! و من المسئول الي وافق ؟ و ايش المعايير الي اتخذوها عشان يحددون الاسعار ؟!

حماية حقوق المستهلك .. الى متى ؟!