مطعم لمزاني بيرفع نصف ريال على السيخ من 07/11/2011

[نجدي قطري]

ابشر بعزك يا الحبيب مطعم الشعب فتح في أم غويلينه جنب مطعم اليازي للمجابيس وعجيب الصراحة في رمضان انا كنت امطيح عنده

يه.
ياخي آنا يا أخباري بايتة يا مغلوطة.
أخبر قالوا اليازي اللي في أم غويلينة سكّروه. قمت أتحسّر على الهريس.
بس ما دامه مفتوح يبشر سلمان بسعده.
ومشكور الحبيب على معلومة كباب الشعب. بصراحة ما له حل.

[HelperIT]

من صجكم لمزاني ! هو صج كبابهم حلو بس كلش كلش ما يتقارن بالي جنبه ...اقصد خوش كباب !

خوش كباب حكايه والله !

[khaldoon]

السلام عليكم ورحمة اللة وبركاتة

انا اشوف اهل قطر من مطعم ايرفع نصف ريال ولا ريال ولا ريالين كلن قام علية
وشركات السيارات ترفع قطع الغيار اضعاف ماحد قال شى
والسيارات ارتفعت اسعارها بـــــــ 20000ريال و40000ريال ماحد تكلم ولا قال خلونا نقاطهم
هاى الشركات
عبدالغنى كل يوم يرفع اسعارها سياراتها وماحد قال شى وكل ما ريفع الاسعار تراكضت الناس علية علشان يشترون منا

و عليكم السلام و رحمة الله و بركاته

معقول يا اخوي هالمقارنه هذه غير المنطقيه؟!!!!!!

هي منطقية من ناحية نظريه بس اما مع وكالة عبدالغني فلكل قاعدة شواذ

يعني تقارن وكالة عبدالغني حبيبة الجميع بالمطاعم

اخوي وكالة عبدالغني لانها تعرف اشكثر الناس تحبها و تموت فيها بتتدلل كل يوم على الشعب و بترفع الاسعار و تعرف انها ايش ما رفعت مستحيل الناس ترفض لها طلب و توقف عن التعامل معاها و شراء السيارات منها

اما المطاعم فنقدر نغيرها

[khaldoon]

انا معاك اخوي في هالنقطــة انهم نفس الاسعــار (السيــخ بـ 3 ريال)

بس الي يفرق انه لحم الكباب عند خوش كباب لحم (استرالي) فرش ذبح محلي والدجاج بعد حي فرش

والي عند اللمزاني لحم مستــودر مبرد

بس عيب مطعم خوش كباب ان الخبـز والخضره (الجرجير) كل واحد وسعره يعني مايجون مع الكباب

بس الصراحة يستاهل كفاية الخبز المسمسم الي عنده ودك تاكله بدون اي شي

والاهم من هذا اني اكل لحم فرش ومحلي ذبح الدوحــة

جرب من عنده وعطني رايك

وعليك بالعافية

جزاك الله كل خير و اكيد المره الجاية ما راح اروح الا على خوش كباب

[khaldoon]

khaldoon

إذا رحـت خوش كباب كلمني عشان أجربـه معاك :..

سلامي للكل

في ذمتي إنك منـّور :.. وين غطيـــت :.. !!!!

حياك الله يا الغالي

والله شكلي بروح الاسبوع الجاي او اليوم

[khaldoon]

دلوني وين مكان محل لمزاني ومحل خوش كباب ؟

من كلامكم يشهي اليوم بالليل بروح له انشالله

تعرف مركز الراشدي و مركز العالم الجديد ؟ ( صوب إشارات السيفين )
شارع حمد الكبير
في دخلـه بينهم :.. إدخلها و روح سيده بتلاقي لمزاني :.. و عقبـه خوش كباب :..

بو الجوري

يسلمو دليته

ان شاء الله بس عجبك الاكل؟

هنيئا ان شاء الله

[khaldoon]

اغلب مطاعم الكباب سعر السيخ عندهم 3 ريال ... مع انه كباب لمزاني كان افضلهم في نظري لكنه كان اقل منهم بنص ريال ....... بما انه رفع نص ريال وصار السيخ 3 ريال ...فاعتقد هو تساوى مع الباقين

هو رفع مع الخيل يا شقرا و الا هو مب محتاج يرفع و هو قاله بصراحه لي و اكدها بعض الاعضاء انه رفع لانه كل رفع اسعاره و هذه نقطة الخلاف الرئيسية في الموضوع

يعني احنا المستهلكين مثل الفريسة اللي واقعة بين انياب و مخالف التجار الجشعين و تلاقي واحد منهم ينظر اشلون زملاؤه ياكلون بالفريسه فبدل انه يشفق على هذه الفريسه يروح يشاركهم و ياخذ له نصيب منها ....و كأنه فلوسنا حلال لهم و مب تعبانين فيها و الا مثل ما يقولون لاقيين فلوسنا بالشارع

[khaldoon]

اهم شيء انه ايراني سني

الله يبارك له في حلاله

ايراني سني مب معناته اخوي انه يكون جشع و استغلالي

شوف الرد اللي فوق لو سمحت و بتفهم قصدي

في دولة عربية تلاقي المواطن فيها يمشي لاخر الشارع علشان يشتري من تاجر سني و اغلى بعد مع انه تلاقي تاجر مسيحي او شيعي يبيع ارخص منه و تحت البيت و العكس صحيح ....ما نبي نكون مثلهم و نتعامل بعنصريه طائفيه بهالشكل

والا بنصير بكره نلاقي عيادة الدكتور الشيعي فلان الفلانه للشيعة فقط او للسنة فقط او للكاثوليك فقط او للاورثوذكس فقط ...ما نبيع نتعامل بناء على الطائفيه


ما ارضى واحد سني يستغلني برضاي بس لانه سني مثلي...هذا الكلام بصراحه غير مقبول

نبي التجار ينظرون لنا نظره انسانية و اخويه قبل كل شيء

[khaldoon]

عندنا بالاحساء مطعم شعبي وعليه كباب كويس مره

السيخ الواحد بريال

ويكفيك 7 او 8 اسياخ

الله يعينكم يا اهل قطر على الغلاء الفاحش بالاسعار

الله يبارك لكم و يهنيكم

يا ريت التجار الجشعين عندنا يروحون ياخذون دورة عند تجاركم

[khaldoon]

حصلت مكان احسن منه وللحين مارفع ولا نص ريال


اشارات السينمات ،، تدخل كانك رايح منطقة النجمه ،، اول لفة يمين

بعدين ثاني لفة اسمه مطعم كباب الشباب اتوقع جذي ممتاز كبابه

خلاص بجربه ان شاء الله

كل الشكر مشرفتنا الفاضلة