انت بتكتفي انا مب مكتفية اهم شي ما كان قصدي وفهمتني غلط ( معليه بوخليقة رادة لك اصبر علي )
بشكل عام في مثل هالمواجهات النقاشية تبرز قدرة الانسان المتعمق في بحثه و معلوماته
في التعامل مع المعلومات المطروحة على ما هي عليه او تعديلها او تصحيحها ،،
طبعا مب تقليل فيك يا محمد ،، بس اسمح لي اضرب لك مثال حي لكلامي السابق
في حوار ما في هالمنتدى تقابلت مع العضو الوكرة ،، ولأني مستخدمة عادية
تكلمت عن الرومات وكلامي كان غلط ،، فصحح لي الوكرة كلامي ووضح لي وين الغلط فيه ،،
لأن الوكرة بالنسبة لي مستخدم غير عادي ،،
اما يوم ضربت لك المثال ما بين مستخدم الايفون والاندرويد ضربتهم بناء على نموذجين في البيت عندي ،، وقلت لك ان الاوبن سورس مب بس يفيد المطورين في استحداث تطبيقات يديدة حتى مستخدم النظام يستفيد ،، رديت علي وقلت لي : انا الايفون يعطيني كل شي من غير ما ابحث ،، فقلت لك الاندرويد يعطي المستخدم العادي تطبيقات تعادل 95% من تطبيقات الايفون،،
لكن وين التمييز بيكون ؟ في المستخدمين العاديين ؟ ؟
قلت لك في المستخدم غير العادي ،، اللي يتعمق في فهم النظام بشكل أكبر
فهناك 3 فئات يستفيدون من نظام الاندرويد
1- المطورين
2- المستخدم غير العادي
3 المستخدم العادي
وفي ايفون هناك فئتين بس هم اللي يستفيدون من النظام
1- المطورين
2- المستخدم العادي
لأن مافي مستخدم غير عادي في هالنظام ،، وهذا واقع بسبة ان النظام مغلق
فشي مب من تأليفي ،،
وهالأمور اللي ذكرتها ما يبي لي استخدم الأيفون علشان اتكلم عنهم صح والا لا ؟
لذلك اتفق معاك من الاجحاف اني احكم على نظام وانا ما استخدمته ولا جربته،،
لكن من العدل اني اتكلم عن التغيير اللي حصل على مستخدم نظام الاندرويد في البيت عندي
فالمفروض تقول لي : الا يا ام السعف ترى في مستخدم غير عادي في نظام تشغيل الايفون
واتصحح لي معلوماتي لو كانت غلط ،،
وهالأمور ما يبي لها دراسة وتخصص هذي امور معلوماتية متاحة للجميع والكل يقدر يبحث عنها اليوم في عصر الثورة المعلوماتية ،،
لكن بشكل عام ما قربت صوب نظام الايفون بشكل تقني ولا شكل سطحي ولا انتقدته
ما تكلمت لك عن الشاشة ولا اللمس ولا الهيكل الخارجي ولا قوة اداء الجهاز ولا قوة اداء النظام ولا اي شي تقني ثاني ،،
بالعكس اشوف اني ذكر ان غلق ثغرات في الاندرويد يفتح ثغرات ثانية
بينما نظام الايفون محمي بشكل عام ،،
مب عارفة شنهو يعني كلمة تعمقت صارت مستهلكة ،، المهم عندي اني احترم وجهة نظرك
لكني ارفضها شكلا ومضمونا بخصوص مصطلح يتعمق تعمق متعمقا ،،
واتمنى لك دوام التوفيق والتطور والتعمق عمليا في اي موضوع بتكلم عنه
التعديل الأخير تم بواسطة ام السعف ; 05-07-2011 الساعة 09:07 PM
جزاهم الله خير بس شغل الـ Webkit مش من الصفر ، هم استخدموا نواة الـ KDE مفتوحة المصدر وبنوا شغلهم عليها وما بنوا كود مصدري من الصفر ووزعوه لله
والفيرفوكس مش مبني على الـ Webkit هو مبني على أدوات خاصة بشركة موزيلا صاحبة الفايرفوكس (وقاعد أكتب لك من متصفح الفايرفوكس خخخخ)
بخصوص تعليقي ، اللي حبيت أوضحه إنه يعيب على الآخرين إغلاق مصادرهم وهو عنده حجات بسيطة جداً مفتوحة المصدر والباقي كلها مسكره ، فإن كان يحب الناس تفتح مصادرها فخله يبدأ بنفسه وما له دخل إنه تعبان على برمجياته ، مب هو اللي يبرمجهم أساساً ، بس ليش يتم الجحف بتعب الناس الآخرين
الشيء الذكي في أبل ، اكتشاف البرمجيات الجديدة وتبنيها وتطويرها وغلقها وأخذ براءة اختراع ، وبعدها لو المصمم الأصلي يسوي له أداة شبيهه مفتوحة المصدر وينشرها عادي أبل تحاكمه وتغرمه خخخخ
وبتابع الردود الدسمة الباقية وراح أبدأ أعلق على البعض
HTC One
انزين شنو تعريف المصادر المفتوحة بالنسبة لكم ؟؟
وهل يشترط فيها إن مستخدمها يجب أن يكون ملماً ببرمجة البرمجيات وتصحيح الأخطاء وإنه يشتغل بنفسه على كل شي ؟؟
مجرد سؤال بسيط أبني عليه نقاشي
HTC One
نبي موضوع فيه احصائيات عن الايفون والسامسونج ونشوف اكثر الناس تأيد ايش اذا ممكن يعني
احس السامسونج مش بسيط من ردودكم
والله المستعان وبالتوفيق
الفكرة الله يسلمك مب بس في الجهاز ... الفكرة في البرنامج اللي في الجهاز ...
برنامج النظام في السامسونج هو الاندرويد ... اللي مسويته شركة جووجل ... عشان ينافس نظام iOS لشركة أبـــل ...
بما إني من انصار الايفون ... حاليا على الأقل ... اشوف الـ iOS هو الافضل حاليا في كل المقاييس ...
لكن أتوقع ان المستقبل للاندرويد ... ونظام Windows 7 phone ... اللي طورته شركة مايكروسوفت عشان ينافس هالاثنين ...
إلا اذا أبــــل سوت شي جديد وغيرت قوانين اللعبة ...
يحق لك يا بوعلي 2 ،، اليوم لو بتسأل ناس يحطون فلوسهم في تقنية اطور تلقاهم يسئلون
عن الأمور التقنية ويحرصون انهم يتعرفون عليها ومن ثم يشترون الاكثر تطورا ،،
لكن احنا في الخليج كثقافة شرائية دايما مع الخيل يا شقرا ،، طبعا كلامي هذا مب تقليل
من الايفون 4 ،، بس لأن الغالبية يمتلكون ايفون 4 نادر ما تلقى حقانيين يعطون الجهاز
حقه من حيث قوة مواصفاته ،، فمن جذيه لو لقيت لك واحد اليوم يبي جهاز يديد بتلقى النصيحة
بتوجهه الى الايفون 4 على اساس الاكثر انتشارا ،، بينما عند الناس اللي فاهمين الشغلة
ويتعاملون مع التطور الحاصل في عالم التكنالوجيا راح يقولون له جالكسي اس 2
مب بس علشان نظام التشغيل الا الجهاز بكبره من معالج ورام وكاميرة وفيديو وشاشة متفوق على الايفون 4 ،، بس شخصيا ما حبيت شكل الجهاز وحسيت بنفور منه والهيكل الخارجي
جدا بسيط ما يرتقي لمستوى جودة هيكل الايفون او اي جوال ثاني ،، فللرزة ايفون 4 اما للتقنية المتطورة جالكسي اس 2
هذي الفروقات ما بين
جالكسي S والايفون 4 شوف اشلون سامسونج تناطح ايفون في امور واشلون تفوقت في امور ثانية ،، وما بالك في النسخة اليديدة من هالجوال اللي اسمه
جالكسي II S
عطني وقت بس اخلص ريوقوي واجمع لك معلومات في الفرق ما بين الاس 2 والايفون 4
خلصته
التعديل الأخير تم بواسطة ام السعف ; 06-07-2011 الساعة 02:23 PM
من خلال موضوع اخونا كريستال في الرابط التالي باقتبس لك مواصفات الجالكسي اس 2
http://www.qatarshares.com/vb/showthread.php?t=456909
المعالج 1.2 Dule Core Exynos
ذاكرة داخلية اما 16 او 32 جيجا بالإضافة إلى ذاكرة خارجية تصل إلى 32 جيجا
الرام 1 جيجا
واجهة خاصة من سامسونج TouchWiz 4.0
شاشة بحجم 4.3 إنش وبتقنية Super AMOLED Plus
نظام أندرويد 2.3.3
كامرة امامية 2 ميجا بكسل
كامرة خلفية 8 ميجا بكسل + فلاش والتصوير HD لغاية 1080
بطارية بسعة 1650 mAh
وزن الجهاز فقط 116 جرام
ومن ثم نحط الجدول هذا اللي يبين مقارنة بالهاردوير بين iPhone4 vs Galaxy S II
إذا أردت اختصار هذه المقارنة تكفيك الجمل التالية
جالكسي اس تو أفضل بالوزن وسرعة المعالج والرام والروم والكاش ميموري والشاشة وحجم الشاشة ومنفذ التلفاز وتقنية الشبكات ونوع منفذ اليو اس بي وأمكانية اضافة ذاكرة خارجية وإماكنية الشحن بأي منفذ يو اس بي غير خاص به وبتقنية البلوتوث والواي فاي والكاميرا الأمامية والخلفية ويحتوي على أف أم راديو وبطارية أكبر
آي فون فور أفضل في رزلوشن الشاشة وعدد الشبكات العالمية
شوف في ايش بس صار الايفون احسن
بكل بساطة جالكسي اس تفوق على الايفون كجهاز ،، وما بالك في جالكسي اس 2
في نقطة لاحظتها من خلال بحثي ان المادة المستخدمة في صناعة الهيكل الخارجي
للجالكسي مب بلاستيك مادة مب متذكرة اشكانت وما ادري وين راحت الصفحة
بس بعد الشكل بالنسبة لي مب مقبول كلش وانتظر شكل اجمل وديزاين ارقى