المشاركة الأصلية كتبت بواسطة AlWakRa
شمعة الدوحة ، الأغراض توصل للبريد الممتاز بالمطار -قبل سامكو- ، وأعتقد يقدرون يرسلون على صندوق بريدج إذا تبين ، عن نفسي رحت خذيتهم دايركت ولا أعور راسي وانتظر على ما يوصلون البريد
عاد مشكلة تداومين في بنك وما تعرفين ذي ههههه ، الظاهر مب صوب البطايق، أنا صار لي اسبوعين أداوم في بنك بعد في قسم البطاقات والصرافات -عوار راس- وعرفت كل شي خاص فيهم ، بس زين بيغيرون قسمي الحين (تدريب صيفي من الجامعة)
خذ الفلوس وشررد يا أم السعف خخخخخ
الموضوع يبيله اشوية تفكيير
في البداية ، بوضعي الحالي أنا ما حاط الخسارة خيار أبداً ، اللي حاط في بالي إني أطلع هامش ربح بسيط يضمن استمرار التجارة ونموها حبه حبه حلو ، لأني ما أشتغل رسمي ، باقي لي آخر كورس الجامعة والله ييسر وأفتك من جامعة قطر الخريف الجاي -اقصد الشتا، ما عندنا خريف بالدوحه خخخخ-
الموضوع يبيله تسويق جامد للجهاز أولاً علشان تمشي الكفرات ، وعندنا الناس مشكلة نسبة قليلة تحب المخاطرة وأخذ أجهزة ثانية ، ممكن نقول إنهم بدوا يغيرون لأن الجهاز أثبت نفسه ، بس بعد يبيله فترة
إذا بديت التجارة فعندي ايجابيات على الثانيين، إني بجيب كفرات لأجهزة قلة من يجيبون لها ويمكن بعد ما في لها إلا عند الوكيل ، السعر بيكون مناسب إن قارناه مع الوكيل ، ووجود تشكيلة بالنت حلوه للجهاز
السلبيات هي إن أسعار الكفرات نفسها غالية من برع ، أرخصهم على 10 دولار تقريباً ويوصل سعرهم ويوصل للـ 60 دولار للحافظات الجلدية ، والسعر المتوسط تقريباً 25 دولار
إن يعني أسعار البيع راح تتراوح بين 50 ريال وممكن توصل لـ 150 ريال ، طبعا استثنيت المحافظ الجلدية لأن أسعارهم الأغلى ومالها اقبال كبير
بعدين عندنا حماية الشاشة ، ترى الشاشة ضد الخدش بس مب كل أنواع الخدش ، يعني لما مفتاح مع الشاشة ويتهاوشون الوضع بيكون أوكيه ، بس إنه يطيح على الأرض فهاي راح يخدشه ، أنا عن نفسي جبت نوعية ضد البصمات لأني كلش ضاق خلقي من كثر ما أمسح الشاشة ههه وهذول أسعارهم تقريباً 12 دولار يعني راح ينباع بـ 50 أو 60 ريال خخخخ
بس إن كنت أبي هامش ربحي لازم السعر يرتفع أكثر لأن فرق ريال وإلا ريالين وإلا عشر عن سعر الشراء ما راح يأمن لي الربح الكافي للاستمرار لأن في تكاليف الشحن وأعتقد ببعض الحالات يكون في جمارك للكميات الكبيرة والكثير من المؤثرات الخارجية
مع كل هاي في تهديدات Threat << ما عرفت أجيب مصطلح أحسن بالعربي خخخ
أحدهم وأبسط مثال أقدر أفكر فيه هو إن يطلع لنا واحد من التجار القدامى والثقة يحسدني على التجارة الماشية ويجيب الكفرات بكميات أكبر ، وطبعاً الثقة اللي بينه وبين الأعضاء هي اللي راح ترجح كفته (وتجارنا فيهم الخير والبركة بس مجرد مثال عاابر وما أقصد إنهم حسودين بس مجرد إضفاء نوع من الطرافة على الكلام ههه)
بتتعقدون معاي لأن هاي في عميق تخصصي ههههه (تسويق، تراه مب مجرد ترويج للبضايع) وطبعاً إن بديت التجارة راح أحط هدفي إني أوصل لعمل عقد تجارة مع الشركات المصنعة للكفرات وينفتح محل خاص وموقع للشراء الالكتروني يعني أحلام اليقظه الحين لووووول
والله يوفق الجميع باللي يثابر لأجله