{ تعريف الشعر -مما أعجبني- .. ~
السـلام عليكم ورحمة الله وبركاته
نايف معلا العتيبي
شاعر جزل بكلام عذب
اترككم مع قصيدته
الشـعـر تعريـفـه بــدون أيــة جــدال
(كـلام لـه معـنـى مقـفَّـى ومــوزون )
ولـو قالـوا أبـا أقـول عـن كـل الأقــوال
هـذا الصحيـح وقـولـوا الـلـي تقـولـون
ماهـو كـلامٍ كـيـف مــا قـيـل ينـقـال
وش لون ؟ مدري ! كيف ؟ ياكيف ! وش لون ؟
لا قافـيـة ، لا وزن ، لا نـعـت ، لا حــال
لا وصف ، لا تشبيـه ، لا شكـل ، لا لـون !
يعنـي سوالـف بـس مـن غـيـر مـنـوال
سولـف واسولـف وأكثـر النـاس يوحـون
حتـى لـو إنــك جبتـهـا مالـهـا جــال
أهــم شــي تـكــون رزَّه ومـزيــون
وفـي يـدك ساعـة تعطـي ألـوان واشكـال
مطلـيـة بألـمـاس مـاهــو زركـــون
وفي أصبعـك خاتـم فضّـه ، وفصـه جـلال
مغيـر يلمـع كـل مـا قـلـت هالـلـون ؟
وشمـاغ لــولا حبكـتـه قـلـت طـربـال
لاوالله الطـربـال مــع شكـلـه يـهــون
وعقـال مـن شافـه حلـف ماهـو عـقـال
يـقـول : هــذا عـقـال وإلا درقـســون
وثـوبٍ مفصـل مـاهـو آيــات تفـصـال
لـو تلبسـه عـذرا غـدا القـلـب مفـتـون
مـاهـو بـثـوب الـدفّـة بمـيـة ريــال
خامـة قماشـه بألـف ، وألفيـن عـربـون
وإن كنـت فاضـي يـوم ماعنـدك أشـغـال
علـيـك باستـديـو زمـانـي أو فـنــون
وطـق لـك صـورة كايفـه مالهـا أمـثـال
ويفضـل إنْ إيـدك عـلـى خــدك تـكـون
وحـاول تعـرف لـك علـى شخـص محتـال
إعـلامـي ومشـهـور مـاهـوب مـدفـون
بإمكـانـه يخلـيـك فــي أيــام ولـيـال
مشهـور مثـل النابـغـة وابــن خـلـدون
وحـاول قبـل كـل شـي تغـريـه بالـمـال
ليـن إنـه بكبـره يصيـر إلــك مـرهـون
وأشيـا كثيـرة غيـر هـذي عـلـى الـبـال
يانـاس ! ياعالـم ! هـو أنـتـم تشـوفـون
موروثنـا الشعبـي غــدا نـصـه خـبـال
بيديـن متـشـدق ، وســاذج ، ومجـنـون
مـن عقـب ماكـانـت تـوارثـه الأجـيـال
أصبـح مـجـرد شــي زايــد ومـركـون
ومـن عقـب مـاكـان يتنـفـس ويخـتـال
صـار أكسجينـه ثانـي أكسـيـد كـربـون
تعـرضـوه صـويـر ، وعـويـر والـفـال
للـي عـلـى نـهـج الثنيـنـه يسـيـرون
صويـر جنـب عـويـر ، وعـويـر دجــال
وعويـر جنـب صويـر ، وصويـر ملسـون
عـويـر لامــن قــال : يــالال يــالال
صويـر يصـرخ ! ياخـي إبـداع وجـنـون
يـامـال فـرقـا العـيـن يـامـال يـامـال
جنـون يمـكـن لـكـن إبــداع تبـطـون
وإليـا سمـع بيـتٍ مـن بـيـوت الأبـطـال
فلنفـرض إنـه مـن بيـوت ابـن لعـبـون
عقـد حجـاجـه وإنقـلـب جــده هـبـال
وراحـت علـومـه كلـهـا دون فــي دون
وقـال الحقيقـة كـل عصـر ٍ لــه رجــال
وحـنـا بعـصـر التلـفـزة والتليـفـون !
لكـن ويـش الـفـرق يالـغـادي الـضـال
لكـل عصـر رجــال والشـعـر مصـيـون
مـاهـو بعـرضـه للمـهـبـل والأنـــذال
الـلـي لـيـا بـانـت نجـومـه يغيـبـون
نجـومـه الـلـي يستحـقـون الإجـــلال
أمثـال ، بنـدر ، والزلامـي ، وابـن عـون
وابـن سنـد ، والأكلبـي ، وابــن هــذال
وبـدر الحويـفـي ، والعسيـلـي يـعـدون
هـذا مثـال ، وبـاقـي أمـثـال / وأمـثـال
أسمـاً ذهـب , وأصحابهـا مــا يهـونـون
والشـعـر مهـمـا صــار بـاقـي ولا زال
وشعّـارنـا فــي كــل وادي يهـيـمـون
ياكثـرهـم كـثـراه لا جـــت لـــلأزوال
وإن جــات للشـعـر الحقيـقـي يقـلّـون
مليـون لكـن لـو تجـيـب إلــك منـخـال
وتنخلـهـم بمنـخـال مـاهـم بمـلـيـون
وأنـا مـا أبـري نفسـي بـكـل الأحــوال
أخـاف فـي المنخـل مـع اللـي يطيـحـون
لـكـن والله مـانــي قـصـيـر حـبــال
ولانـي مـن اللـي فـي القوايـل يضيعـون
والشعـر احـبـه حــب مافـيـه مـدخـال
مانـي وصــي الشـعـر لـكـن مغـبـون
مــن نــاسٍ تـحـاول تحـيّـل وتحـتـال
نـاس ٍ بحـذف السيـن والألــف والـنـون
عمالقـة واحـدهـم إنْ قــال مــا طــال
فطاحـلـة وإن جـيـت للـحـق مـالــون
تحـت مسمـى الشـعـر يبـنـون الآمــال
وآمالـهـم ياجعـلـهـم مـــا يـفـيـدون
صـورة علـى غـلاف المجـلـة بمـدهـال
وإلا حــوار مـطـول وفــي التـلـفـزون
وأعمالـهـم والله مــن شـيـن الأعـمـال
هــرجٍ يجيبـونـه وهـــرجٍ يـــودون
فـلان قــال ، وقــال . وفــلان رجــال
وفـلان ماهـو رجــل ، وفــلان دنــدون
أقـول ! ناولـنـي مــن الكـيـف فنـجـال
ماعـاد صـدري يحتـمـل كـثـرة غـبـون
يقـول ابـن جـدلان مـن عــرض مـاقـال
(تكفـون صونـوا كلمـة الشعـر تكـفـون)
وانـا بقـول اليـوم عــن كــل الأقــوال
(هـذا الصحيـح وقولـوا اللـي تقـولـون )
|
رد مع اقتباس
المشاركة الأصلية كتبت بواسطة امينه احمد
جزاك الله خيرا
!!!