:: الرياضه في كورنيش لوسيل vs السكوترات والسرعه الجنونيه !::

..

بسم الله الرحمن الرحيم،،،

ياجماعه إفزعوا لنا شالحل وشنهي الجهه المسؤوله عن
هذا الجنون، الواحد يروح يتريض مع هله ويتفاجأ
بتصرفات جنونيه وما أبالغ بأنها ممكن تتسبب
بحالة وفاه لأحد الأطفال لا سمح الله !

اليوم فيه سكوتر عباره عن إزهبه شطّف لي والأخ
رايح راد بين الناس بسرعه كبيره بصراحه شي
مزعج جداً، وبعضهم بقروبات سكوترات بعد !

شلون الواحد بيمشي بمسار عرضه تقريباً خمسه متر
وفيه كل انواع الجنون ذيه، بالمناسبه يوم السبت رحنا
صوب الكوفيات والمطاعم والممشى كان ضيق من قلب
وتفاجأنا إن فيه موتر صجي يمشي ههه هنيه خلص
الكلام والله ما استوعبت حزتها ورجعت البيت وقلت
في خاطري أكيد هدفه نبيل وآنا فاهم الدنيا غلط :)

..

ايه والله شفناهم شي غريب . سرعه كبيره تصل 60 كم او اكثر لبعضها
وانا مش عارف هل مسموح لهم ذلك ولا تجاوز !!!!!

اذا تجاوز . وش دور السكورتيه الي تارسين الممشى
واذا مسموح لهم . لازم يراجعون القرار خطر كبير الي صاير

دامهم حاطين السكوترات هناك فيعني مسموح فيه ..
في حديقه الكورنيش وحدة دعمت اختي بالسكوتر من الخلف ( من غير قصد ) لكن جابت لها اصابه في ركبتها ..
هالسكوترات ماادري شفايدتها الصراحة لو يشلونهم من هالاماكن الصغيرة ويحطونهم حق بنات الجامعة اللي كل كليه في فريج ابرك والله ..
اصحاب القرار مايجون هالاماكن عشان جذي مايدرون شالسالفه..

اقتباس:

---

المشاركة الأصلية كتبت بواسطة سعود.

ايه والله شفناهم شي غريب . سرعه كبيره تصل 60 كم او اكثر لبعضها
وانا مش عارف هل مسموح لهم ذلك ولا تجاوز !!!!!

اذا تجاوز . وش دور السكورتيه الي تارسين الممشى
واذا مسموح لهم . لازم يراجعون القرار خطر كبير الي صاير

---

السكيورتيه أغلبهم خوافين جربت تكلمت معاهم كذا مره،،،

وثانياً أساساً فيه سكوترات متنثره على طول الممشى
يعني شلون بيمنعونهم أساساً والسالفه بزنس
وفيه ناس متنفعه من هالبزنس @@

الأسبوع الماضي كلمنا الشرطه وطرشوا دوريه
وهالأسبوع والله ترددت قلت في خاطري دام
السالفه فيها إيجار سكوترات وسالفه
يعني "المخرج عايز كده" !

..

..

إضافه عقب تصحيح ولدي:

سكوترات لوسيل سرعتها قليله جداً ومقفوله،،
لكن السكوترات الشخصيه هي المشكله !

عموماً استسلمت من جديد وبلغت الشرطه توني
لأن اليوم أغاني وأصوات عاليه وإلخ للأسف !!
مب فقط سرعه، الوضع صار أخس حبتين ��

..