المشاركة الأصلية كتبت بواسطة معماري قطري
ما شاء الله حطيت صور وايد شكلك تبي تعليقات وايد.
انا عجبني الدفان ورش المبيد وأهم شيء إبتعدت عن البودرة.
لاحظت بعض طابوق الهوردي متكسر وحاطينه والمشكلة يسبب ثقل لو دخلت فيه الخرسانة والكسور ممكن ما تثبت وتنشلخ من السقف مستقبلاً .. هذا لازم يكون متواصل ومسدودة الفتحات في الأخير بإسمنت أو حتى بقطعة ورق المهم ما يدخل الإسمنت داخل.
لاحظت العمود المضروب واللي فاتح الخرسانة من الجنب ويبين لي إن الغطاء الخرساني قليل السُمك في بعض الأماكن .. وهذا بيسبب تكسر في الخرسانة وصدأ الحديد بسرعة.
بعض أجزاء الغطاء النايلون ممزقة .. ولو حد جرب يشتري أفضل الأنواع بيحصل الفرق في السعر تافه لكن المقاولين دوم يحبون التوفير.
ملاحظات تقدر تقول غير مهمة لكن حديد العمود أهمها والمفروض الاستشاري منتبه لهذي النقاط عدل حتى وقت وقبل الصب.
الملاحظة العامة والمهمة للكل هي عمل البنيان على أساس صب الخرسانة بعد بناء الحوائط، لأن نظام التصميم الإنشائي المسلح يتم تصميمه على استبعاد الطابوق وعلى أساس إنه حشو وبس ولا يحمل الخرسانات، بل بالعكس الخرسانة بعد صبها تضغط قوة بسبب تمددها على الطابوق وتسبب إجهادات تبين واضحة على شكل شلوخ متدرجة العمق والسعة في المستقبل، وطريقة البناء المناسبة لنوعية التصميم الإنشائي هي بناء الهيكل الخرساني ثم بناء الطابوق حسب ماصفات محددة وطريقة محددة وبربطه بالحديد مع الخرسانة المبنية مسبقاً، وهذي الطريقة المفصلة في مواصفات البناء القطري .. ليش يسمحون بغيرها العلم عند الله .. وللعلم غير مسموحة نهائياً في مباني الحكومة.. فأرجوا من الكل تطبيقها في مبانيهم وعدم التساهل فيها لأن المقاول يسوي الأسهل له والأسهل طبعاً الطريقة الموضحة في الصور هنا.
