عرض للطباعة
السلام عليكم يااخوان
صارلي فتره ادور شركه تنفذ فلل بتصميم مودرن وللاسف معظم الشركات تنفذ التصميم الكلاسيكي التقليدي وحاليا في توجه قوي على التصاميم المودرن واعتقد عدم وجود شح في المواد الاساسيه للتصاميم الحديثه في السوق القطري، افيدونا يااخوان اذا حد عنده خبره في هذا المجال
ودمتم بود
قدم على مناقصات عندهم شركات تسوي فلل مودرن ..
وبعدين المودرن اسهل من الكلاسيكي في التنفيذ ..
غريبه انك ماتحصل شركة تنفذ لك !!
انت سولك الخرايط في مكتب وشوفلك شركة تنفذ لك ..
اشوف في شركات في الكويت والرياض يسون فلل مودرن تهبل ماشاءالله ..
بس احنا للحين بعضنا عايش في زمان ليالي الحلميه :nop:
وشي مميزات التصميم الحديث؟ أو خل نقول المريح والجيد
الحديث دوم السهل واللي بخطوط مستقيمة وبمواد صناعية .. تقول لي حديث وتركب حجر فيه تصاميم حجرية حديثة تعتمد مبدأ الحديث بدون كرانيش وأعمدة بارزة ما لها خص في النظام الإنشائي
مثل ما قالت إختي سارة وايد عندنا يسوون الحديث وأسهل شيء بس الحديث تشوفه وأي مالك يشوفه على الورق يقول وشو ذيه
انا حاب الحديث اللي بعناصر تجميلية ماخوذة من التراثي ومحدثة وبمواد حديثة ومقاسات محددة .. فوق هذا حاب البناء العملي والمواد المريحة مثل السجاد المريح في غرف النوم ومثل العزل القوي اللي يعطيك هدوء تام ودفء في الشتاء وجو سهل يبرد في الصيف وبرودة متوازية
حاب ما يسمى Flow of Space وعلاقة كل فراغ بالثاني وهذي تدخل فيها العناصر التكميلية مهما كانت صغيرة وتافهة .. مثال كنت مقتنع قبل حتى لو المساحات مفتوحة تقدر تقسمها بأقواس وقطع أثاث وحتى تخلي أرضيتها غير أو تدخل من لون للون متجانس معاه .. ألحين مركز على اتجاه ثاني وهو تجانس الارضيات والجدران المفتوحة على بعض صالات ومجالس وداخلية وشبه داخلية أو حتى خارجية قريبة
الكثيرين عندنا يشتكون إن التصاميم متشابهة وهذا صحيح لحد ما لكن في يدنا نغير ونطلب التغيير بالتبسيط وليس بالتصعيب
اخوي العزيز
باعطيك اياها من اللآخر
كل ن يبي يميز نفسه في بيت العمر وسوالف مطالع غيره من عيال عم وجماعه وربع وجيران بحيث ماحد يغلبه في فخامة ومواصفات وتصميم ومساحة ارض ومجالس تضاهي احجام فلل.
يازين البساطه والمساحات المعقوله.
ارتفاع سقف مجلس مبالغ فيه بشكل ينافس القصور الأغريقيه وكل ن بعقله راضي !! هذا ماكان موجود حتى عند علية القوم من شيوخ و وجهاء البلد اللي كانت مجالسهم تتسم بالبساطه مع قدرتهم بذاك الزمان ان يفعلوا مايفعله العامه بهذا الوقت.
الشاهد بهالمقدمه, عمر المساحات الكبيره للغرف والصالات والمجالس ماكانت مريحه وخاصه مع تقدم العمر وهجر معظم العيال واستقلالهم في منازل يعيشون فيها مع اسرهم وبالتالي كل اللي بنيته وسويته سوف ينتج عن غرف مغلقه مغبره ومهجوره في غضون سنين بسيطه ويغدي بيت العمر اللي خسرنا وتعبنا عليه منزل اشباح فيه عشنا فيه بعض الذكريات الجميله
منزل بسيط جميل فيه مواصفات وانظمه حديثه ومن غير مبالغه وكل شي حولك صالة مطبخ مكتب مجلس وسهل التنقل مابينهم ومعظم الناس ينسون انهم يكبرون كل يوم وبيوتهم بتفضى والأمثله كثيره
و انصحك تطلع من سالفة كوبي وبيست معظم المكاتب الأستشاريه عندنا وتبحث عن شركة اوروبيه او اميركيه تصمم لك فلتك العصريه بحيث تكون متكاملة من تصميم داخلي وخارجي وتنفيذ حتى التكييف وجميع الأنظمه واعتقد بتطلع بنتيجه طيبه من حيث التكلفه والراحه والفخامه والذوق
وبالتوفيق
أحد عيال عمي الكبار معماري قديم ويملك مكتب استشاري ومعاه شريك مكتب معروف أمريكي اسمه أرابيسك متخصص في التصميم المعماري بنفحة تراثية .. هو شغله أكثر خاص وابتعد عن التصميم للأشخاص بس شفت شغله على الطبيعة في بيته ومجلسة ما شاء الله جمال هاديء وتميزاقتباس:
المشاركة الأصلية كتبت بواسطة Thamer_Qat
الثاني اللي شفت له تصميم حديث كان معروض في مجلة .. هو المعماري ابراهيم الجيدة مسوي مجموعة بيوت لأهله في سور واحد وحط صور للبيت وللتصميم العام للمكان كله .. أعتقد عرضتها في أحد المواضيع من كم سنة تعديت التسع سنين في هذا المنتدى وكتبت كثير وأنسى كثير
المكتب الأول عَمار والمكتب الثاني العربي للشؤون الهندسية
شرايك في بيت إخونا ولد الدهيمي .. غانم الدهيمي ما يزعل لو ذكرت اسمه والله يوفقه ويرزقه من حيث لا يحتسب ويرزق الجميع .. شفته على السريع وانا مار وهو ذكر لي تفاصيل وارسل لي صور وفيديوهات وهو فنان في الذوق المعتمد على الخبرة بصفته مقاول وشغال لنفسه ولغيرهاقتباس:
المشاركة الأصلية كتبت بواسطة Thamer_Qat
أحد الإخوان باني بيت بعد بطراز مغاير للموجود .. التصميم دارج بس المواد غير وكثر من الزجاج .. سوى سكايلايت هرمي يتوسط حديقة داخلية بس شكله ألغاها ما ادري ليش ولا وافقته على الالغاء وكان بيلغي المنور لأنه كبير .. سوى المصعد بانوراما في كل الإتجاهات مع إن الدرج حوله بس دريشة الدرج كبيرة تطل على الخارج .. بدال التكسية بالحجر اتجه للفوم بتداخل لونين بني وبيج فاتح وطلع وايد حلو وبقواطع مستقيمة مع شوية تشكيلات بسيطة حول الدرايش
أشوف بيته ناجح بإذن الله
بالنسبة للإرتفاع تأثيره في ميزانية البيت بسيط جداً والمقاول اللي يلف ويدور بسبب الإرتفاع يبغي ينهب وبس ولو يسويه المالك من البداية وبمناقصة بيحصل سعر جيد حتى أفضل من لو سواه قليل الإرتفاع
صدقت اخوي ثامر وانت توصف البيوت جا كذا بيت في بالي مافيه الا العجوز وشويه اشباح ..اقتباس:
المشاركة الأصلية كتبت بواسطة Thamer_Qat
البيوت الكبيرة اذا انت ماعندك عدد يسكنه لاتوسع فيه .. ابني على قدك وخلك مساحة كبيرة بالحوش مستقبلا ممكن تستغله ..
اقتباس:
المشاركة الأصلية كتبت بواسطة معماري قطري
السلام عليكم ورحمة الله
ذكرتني اول ما بنيت البيت وفي مرحلة الخرايط اقترح على المهندس للتوفير في مساحة البنيان ان تكون الصالة في الطابق الارضي تقريبا مربعة 8×7 ونصغر الصالة العلوية بشكل مضلع ومن برع نغطي الزاوية المثلثة بالقرميد. ورسم لي صورة ثري دي الوان وخرابيط وكان الشكل حلو.
اللون الأسود يمثل الصالة الأرضية، والأحمر صالة الدور الأول
https://doha2010.com/muntada/box.png
الحين كل ما اشوف المساحة اللي خسرتها في الصالة اللي فوق اتحسف اني سمعت نصيحته. التوفير ما كان يستاهل خسران المساحة هذي، لا توزيع الاثاث الجاهز يمشي (ولا وضع الكراسي على شكل L أو U يضبط).
تحياتي للجميع.
دوم الواحد لازم يحط في إعتباره توزيع الأثاث لو ما ينفع شالفايدة؟اقتباس:
المشاركة الأصلية كتبت بواسطة بوNasser
انا في تصميمي لبيتي إحترت بين الجلسة الدائرية النازلة في الصالة الأرضية وبين تكون مربعة .. مربعة أسهل عملها وتشطيبها والدائرية وايد أحلى بتطلع وفي النهاية هي صغيرة لعشر كراسي مفردين وهي الجلسة الوحيدة تحت غير المجلس .. أكيد حطيت الدرج اللي بينزل لأرضيتها وحطيت مكان التلفزيون وفكرت في أرضيتها شبتكون ويمكن أفضل خيار تكون سجاد سميك مع أندرلي أو حتى فروة لجدران الدائرة النازلة وأرضيتها .. اتصال الأطراف مع البلاط المرتفع حولها بيكون بفاصل معدني بس ممكن صعب احصله منحني بانحناء الدائرة .. بديل هو تكون الكراسي منجدة ومعمولة تفصيل للمكان هذا والظهر يكون بارز شوي يغطي نهايات البلاط المقصوصة دائرية .. هذي صورة من رسمة الثري دي بس الخطوط وايد وصعب تنفهم .. حطيت رسومات عادية في موضوع مراجعة المخططات المعمارية وألحين خلاص انهي التصميم حتى اوقع عقد مع الاستشاري بالشكل اللي ابيه وهو ينفذ بس باقي الخدمات والرخصة
https://i.imgur.com/zRG8yo5.png
في الصورة خليت كل الطبقات والتصوير مايل 45 درجة تقريباً تبين جدران على الدائرة وهي في الأساس في الدور العلوي وجاية جانبية
هذي أوضح فيه باب سلايدنغ قزاز بين الجلسة ومجرى الماء يمين وعلى اليمين حديقة داخلية بارتفاع كامل البيت وسقفها زجاج وبتكون مكيفة تكييف تلطيفي أقل شيء .. باكملها إن شاء الله ثري دي حتى تتضح الصورة
https://i.imgur.com/CrwnAgw.png
يسار مدخل الصالة وباب ينفتح على المجلس يعني امتداد بصري من أول دخول الواحد للبيت يوصل لنهاية الحديقة الممتدة على 12.1 متر كعمق و 7.3 متر كعرض من تحت بعدين تصغر شوي من فوق لإمتداد الغرف والصالة العلوية عليها
مجرى الماء بيكون مرتفع شوي ومتدرج في النزول لين الأخير ينزل في بركة صغيرة وينسحب للفلتر وللشلال اللي بيكون في آخر بعد الجدار الأخير على مسافة 12.1 متر + حول 6 متر عمق الصالة ولو بنعتبر من بداية فتح باب البيت بتكون المسافة حول 25 متر امتداد بصري بين أشجار ونباتات وماء
ونعم فيك وفيهماقتباس:
المشاركة الأصلية كتبت بواسطة معماري قطري
نعم كلمته بومحمد ورجل طيب ونعرفهم ويعرفونا زين عرب طيبين مايحتاي
شوقتني امر اشوف بيته في لقطه اظن
لا في الريان .. كلمه هو يومياً الظهر هناك تقريباً يومياً بيرسل لك اللوكيشن وأفكاره كلها طيبة والحلو هو اللي منفذها بواقع الخبرة يقول ما يعترف بنا وبالورقة والقلم .. بيته القديم باني فيه مجلس تحته حوض سباحة وتحت حوض السباحة ستور صغير سقفه نازل يخزن فيه القطع الكهربية بس ستور معتبر .. المجلس مسوي فيه حلاق وقسم مساجاقتباس:
المشاركة الأصلية كتبت بواسطة Thamer_Qat
ما فيني شدة الحر والا كان رحت معاك .. والله البناية اللي اصينها ألحين آخر زيارة لي لها من حول 25 سنة ولا ادل مكانها نسيت في أي داعوس في ام غويلينة .. للوالدة الله يحفظها معتمد على الصور وتقارير الاستشاري والمقاول والمسؤول العقاري وأكيد حتى نرضي البلدية ولا تهدم
اقتباس:
المشاركة الأصلية كتبت بواسطة اخصائي
https://i.top4top.io/p_2064uwa451.jpeg
شوف هالشركة القطريه حصلتهم عالانستغرام ..
خذ استشاره مب خسران شي .. الله يوفقك .
https://f.top4top.io/p_2064c2r1s3.jpeg
هذا بعد تصاميمه مودرن ..
لتغركم الدعايات شبكة وهالسوالف وهم في الحقيقة كم موظف شاب وخبراتهم الهندسية نص ونص
صح كلامك خاصه اكبر شركة اكبر نصابين ..اقتباس:
المشاركة الأصلية كتبت بواسطة معماري قطري
اعلانات عالفاضي وقاصين على وايد ناس هههههههههه مااقدر اقول زيادة ( اخاف تخسس فيني وماتكفلني ) :happy:
:
:
عموما هو يختار تصميم مودرن ويشتري الخرايط وتالي يسحب عليهم :taunt:
وايد يا اختي يسوون تصميم منسوخ من مجلة والا موقع ويطورون عليه .. عملية شرعية وسهلة لكن الفرق في التفاصيل وضبط ميزانية البنيان والإشراف الدقيق وتوفير هيكل انشائي كافي للمبنى بدون زيادات في الحديد والخرسانات ما احتاجها وممكن تكون زيادة في موقع ونقص في مكان خطر .. أبسطها الكراكات اللي تستوي والدجل الهندسي باستخدام مواد سيئة والدفان داخل البيت وبين الخرسانات والبلاط برملاقتباس:
المشاركة الأصلية كتبت بواسطة sara jsm
عندي مجلات أمريكية صحيح قديمة بس فيها تصاميم دارجة ويرسلون تفاصيلها وكم نسخة جاهزة للتنفيذ بمبلغ معقول أعتقد 50 دولار وفيه مواقع لهم وشغلهم رسمي .. آلاف التصاميم وبعضها يناسب لنا أو ممكن يتعدل حسب الحاجة عن طريق استشاري وحسب المواد المتوفرة .. ما تفرق كثير إذا هناك الحايط الخارجي 14 سم كمثال وعندنا 30 بعازل نبغيه .. حتى مقاس الغرف عندهم مناسب ولو نبغي نزيد شوي ممكن
أذكر واحد مسوي له دكتور معماري تصميم نسخة بالضبط ومعدل على بعض الغرف حسب اختياره ومسوي مجسم من الفلين بخمسين ألف ريال في 2004 كان وقتها التصميم ب 5000 ريال وبس المعماري عليه ياخذ المخططات حق مكتب هندسي يخلص الباقي
معليش الخدمات والشغل الهندسي المتميز يشتغلونه فريق من المختصين كل واحد له شغلته وتخصصه .. وحتى يعطونا تصميم مناسب لازم ندفع مبلغ مناسب لخبراتهم ولإشرافهم ولإدارتهم للمناقصة .. ما فيه شيء ببلاش واللي يقول لي ببلاش بياخذ كمشنات وبيكون المقاول شاريه بفلوسي وانا الخسران
صراحة عملية المكاتب الاستشارية والمقاولات تحتاج ضبط قوي من الدولة شكثر جرايم ترتكب في حق المواطن والحكومة كذلك بسبب قلة الضبط وتكلمت كثير عن الضبط وكيفيته ومن هم على الكراسي يعرفون بس ما يبغون يدوشون راسهم
عدل كلامك بوعبدالله .. لكن الواحد شيقول !!
الموضوع مايعم باذن الله..
وفي مقاوليين عيال حلال تكون عيونهم عيون المالك :o
حالات قليلة وكثر الغش والتجاوز والتقصير من القوانين وواجب الدولة في تنظيم العملية تنظيم صحيح وبصرامةاقتباس:
المشاركة الأصلية كتبت بواسطة sara jsm
هذا تصميم مودرن عن طريق مكتب تصميم داخلي .. صحيح تفادى أخطاء أو خلوا نقول قصور التصميم المعماري الأساسي وطور البيت بخطوط قلم وأفكار بسيطة .. كلنا نسويها واللي يتابع تعديل المخططات المعمارية بيشوف شيء مقارب
https://www.youtube.com/watch?v=M6U-nCPBOI0
لو أي شخص حب البيت المعروض فوق أي رسام مب مهندس ممكن ينقله له ويطبق تفاصيله لو حب ويزيد عليه حسب احتياجه
لو بتسئلوني عن البيت اللي راح كم يكلف باقول بحدود القرض مليون و200000 كأقصى حد
عاد والله البيوت التقليديه فيها اُلفه اكثر من المودرن ..
انا جذي احس .. دايما البيوت القديمة او الشعبيه ادفى من الحديث او التصميم المودرن ..
تقليدية مصطلح صعب في الوقت الحالي ممكن مودرن بنفحات تقليدية إيه وبتكون فيه أُلفة بعد .. الأُلفة اسلوب حياة واستخدام .. بيت جدي الله يغفر له كان تقليدي شكل حرف l والغرف كلها تطل على ليوان اسمنت والحمام تكرمون في زاوية في الطرف ومرتفع بعتبات طابوقاقتباس:
المشاركة الأصلية كتبت بواسطة sara jsm
بيت جدي الثاني كان بشكل مقارب بس فيه عين ماي وزرع وفيه الزوايا اللي يسمونها القمرية .. الأول كان ملاصق للسور وظهره في الطريق الخلفي ما كان وقتها شارع بالمعنى الحالي وكان مواجه غرب الظهر ووجه البيت وأكثر الدرايش الخشبية كانت شرق وفي الغرب درايش صغيرة للتهوئة وكانت عالية وايد والشرقية نازلة وايد
الثاني كان شوي متوسط وراء البيت حوطة للحلال وجدام الزراعة .. كانت جدتي رحمة الله عليها تعتني بكل البيت وكان أصلاً بيتها صحيح بانيه خالي الكبير رحمه الله بعد وفاة جدي أعتقد في نهايات الخمسين أو بدايات الستين .. بيت خالي الكبير نفس تقريباً بيت جدي الأول ابو والدي وإحنا عشنا طفولتنا في بيت جدتي بس جدي رحمة الله عليه وخالي الكبير كانوا دائمي المرور علينا وخالي الصغير كان صديق مقرب للوالد يتعاونون في كل شيء .. مع إن جدي والد ابوي كان باني بيت من الأساس حق ابوي في طرف بيته وبيت ثاني حق عمي رحمة الله عليهم كلهم في الطرف الثاني لكن بيت ابوي ما انسكن الا بعد 27 سنة تأجر
هذا التقليدي يا اختي بمعناه الأصلي .. البيت اللي انولد فيه الأمير الوالد موجود غربي الديوان القديم صوب شارع الكهربة وشارع الريان وتم ترميمه لحالته الأولية والظاهر فيه نية تحويله متحف صغير ما ادري بالضبط .. بس بعد ترميمه ترك وجاوا ناس تعبثوا فيه وشخبطوا على الجدران وكسروا
البيوت الثلاث اللي ذكرتها كلها هدمت وبنيت مكانها بيوت حديثة الا بيت الوالد للحين باقي بس طلبت البلدية هدم جزء منه وطلبت صورة للسقف الخشبي القديم ارسل لي اللي ساكن فيه بس تمنيت يرسل صورة الجسر من الدنجل وأول مرة أشوفه بهذي الطريقة
ما ادري ليش الال طلعت آي بالانجليزي والمفروض ال كبيرة
شيء ثاني مهم نسيناه أو نتناساه وهو التطور في العلوم الهندسية وفي المواد
قبل كانت مواد بسيطة ورخيصة ومحلية وحتى التطور فيها خذ فترة .. شفنا بيوت حصى وطين وشفنا حصى وطين وجص وشفنا الاسمنت يدخل عليها وشفنا الصبان يفرش ارضيات كثيرة وهذا صار منقرض حتى الجص .. الجص للي ما يعرفونه يستخرج من حجارة جيرية ومن مواقع محددة وقليلة في قطر تحرق هذي الحجارة وتطحن بطرق بدائية وتكون مادة بيضاء لاصقة قريبة من الجبس والاسمنت الأبيض
للأسقف شفنا الدنجل وبعض الأخشاب المربعة الطويلة والقوية وشفنا الخوص وشفنا فوقه الطين والقش .. هذي كلها شبه معدومة حالياً وإن حصلت تكون غالية وتنفع لتطعيمات ولتجميل محدث بعيد كلش عن التقليدي
من هشكل المودرن هو الطاغي
الغالبية يشتكون من إن التصاميم ألحين تتشابه وهذا الحال كان قبل بس ما يمنع قبل كانت حالات شاذة ومباني انبنت يمكن مع بدايات الحداثة وكانت تحف معمارية وبقت فترة لين الناس بدت تبني شيء قريب منها .. قصر الشيخ حمد بن عبدالله رحمه الله اللي تحول لمتحف قطر الوطني قبل ليسوونه أطباق طائرة داخلة في بعض مثال .. قصور الريان وبعض المباني في القلاع وهي قديمة من أيام الانجليز ولا كانت لأهل قطر العاديين القدرة على البناء مثلها شيء بشيء تيسرت هذي الأُمور وعم الخير واستوى الكل يقدر يبني واستوى البناء الحديث هو الطاغي
قبل كان تركيز الناس على توجيه البيت وفتحات التهوئة والتدفئة وقت الشتاء بالجمر وكان البرد يدخل البيوت والحر صعب بدون تكييف .. ألحين عوازل وأنظمة تبريد راقية .. من فترة كنا عايشين على التكييف النافذة وكانت قطعة بليوت تسد الفتحات اللي يدخل منها الغبار حتى السيليكون ما له وجود .. ألحين اللي يشتكي من الغبار استوى يثير الضحك لأن الحلول موجودة وغالبنا يطبقها
بيوت الانجليز في القرن ال 18 كانت كبيرة وكانت المطابخ بدون سقف وخارجية والطبخ على حطب وهذي المعلومة قريتها في كتاب .. الحين هالشيء مفقود هناك يمكن في متحف .. قبل سنوات كانت دورات المياه مب معروفة وانعرفت عند المسلمين قبل اوروبا وانتقلت لهم .. الحداثة والتطور مب شيء غلط ولا شيء بسيط واحتاجت لعقول ولتطوير
من كم سنة بس كانت الكراسي مثبتة على الأرض وثقيلة وألحين طلعت نوعيات معلقة وناعمة واقصد كراسي الحمامات وبعضها فيها تدفئة وبعضها جلد مريحة للجلوس .. بيجي وقت بنحصل التقليدي يصنع يدوياً وبكميات قليلة وبالطلب وغالي
اي والله :victory:اقتباس:
المشاركة الأصلية كتبت بواسطة معماري قطري
البناء والعمارة تاريخ حضاري مرتبط بالإنسان وبحاجته من بداياته في هذي الأرض ويتطور دوم .. يمكن من أقدم الإختراعات الطبيعية والبديهية المنزل والآلات البدائية للقص والتشكيل .. سامحوني استرسلت والموضوع يمكن ما يستحق بس دوم الحداثة والتطوير ضرورين لحياة مريحة وسعيدة
بشكل عام فإن تنفيذ التصميمات الكلاسيك أصعب من المودرن لوجود الزخارف و التفاصيل الكثيرة. لذلك إن وجدت شركة تنفيذها (ممتاز) في الكلاسيك ، فهي سوف تقوم بتنفيذ المودرن أيضا. لكن الفكرة إن شركات المقاولات (التقليدية) تقوم بتنفيذ الديكور و هي غير متخصصه به ، مما يجعل النتائج غير جيدة. لذلك يفضل التعاقد مع شركة متخصصة في مجال الديكور ، لأن مستوي المهارة و جودة الفينش مختلف تماما سواء كلاسيك أو مودرن.
أكيد الشركة اللي عندها مهنية وعمالة ماهرة تفرق كثير وتكفيك وجع الراساقتباس:
المشاركة الأصلية كتبت بواسطة ALKATARONI
وإذا كنت متفرغ تشرح للفورمان أو العامل طريقة معينة وتناقشه وتتابعه ممكن ينجز اللي تبغيه .. لكن دوم الأفضل عمل هندسي كامل وتفاصيل وشرح مكتوب وعقد ما يترك ثغرة هذي أدوات العمل الناجح