السلام عليكم يالربع ..من يفيدني بمقاول تصنيف جيد خابف الله عندي فله في لوسيل ياريت تعطوني خبراتكم وتجاربكم بارك الله فيكم
عرض للطباعة
السلام عليكم يالربع ..من يفيدني بمقاول تصنيف جيد خابف الله عندي فله في لوسيل ياريت تعطوني خبراتكم وتجاربكم بارك الله فيكم
اصعب سؤال
باذن الله يفيدونك الربع
مقاول خايف الله معادلة صعبة في ظل القوانين الركيكة وقلة الرقابة من الدولة والجهل المتفشي عند بعض اللي يمارسون الشغلة
إذا الحكومة تعاني وأحنا نعاني من شغل الطرق الركيكة وصيانتها .. ما تمر سنة على تعديل الطريق ورصفه الا متموج والمنهولات مرتفعة ومزعجة غير عن المعاناة وقت الشغل وكله مكذبين علينا بقطر تستحق الأفضل .. خاطري أعرف شالأفضل عندهم هل هو ثلاث عمال يطقطقون ببوكلين منتهي وشيول من الصغار ونجال ما ندري شلون عدى الفحص الفني لا والسعر غالي وايد تدفعه لهم الدولة
تعالوا بادخلكم طرق العزيزية شوفها وتوهم مخلصينها قبل 3 سنين وبعضها للحين يشتغلون فيها وانا ما اتكلم عن طرق قديمة منتهية الصلاحية .. طرق معيذر لهم سنين ألحين شغالين فيها ولا خلصوا .. هل هو عذاب مفروض علينا؟ والحفارات الكشخة اللي تحفر بدون ضرب في الحصى هذي مخشوشة للأحياء الراقية
مرحبا الطواش
تصنيف جيد مااعرف ..
تصنيف ممتاز موجود بس فضي الخاص عندك عشان اطرش لك ..
اخاف انزل المعلومات هني يعطونه عين خاصه بعض الناس :whistling:
شايفتنا هنود تعبتنا وايد يا اخوي
بالنسبة لموضوع المقاولين تقدر تحكمهم بصيغة عقدك وشروطك اللي بتنزلها مناقصة وعن طريق الإستشاري وحاط أمثلة لعقود ولحساب كميات في موضوع العقود المثبت في قسم البناء والديكور
مهم المقاول يبرز أوراقه الثبوتية والمخولين بالتوقيع ونموذج التوقيع ورخصة الشركة ولستة العمال والآليات والمعدات للشركة وشارح كل شيء حتى زيارة مقر الشركة وزيارة مشاريعها الجارية ولو فيه سابقة .. الشركات تتغير بين شهر وشهر والمدراء يغطون على أي عجز والحركة والسؤال عن المقاولين بتحصل آراء قديمة وشركات تغيرت 180 درجة بسبب كورونا وكاس العالم اللي خلى الشغل بس لشركات محبوبة وشركات خارج المنافسة وكان مصيرها تأجر عمالها للحيتان الكبار واللي حتى ما يدفعون لعمالهم فما بالك بعمال الشركات اللي مستعيرينهم
ما أبغي أحبطك بس حالياً واحد قريب لي وأعرف شركته عدل شغالين زين في بيت واحد بعد قريب وقربوا يخلصون باقي أشياء بسيطة .. بس اي مقاول بدون عقد قوي وتفاصيل شغل من استشاري جيد مع متابعة وإشراف ما بتحصل منه لا ذمة ولا ضمير الا نادر كلش
أنا ارشح شركة المهندسون المعماريون للمقاولات تعاملت معاهم بصراحة احترام وشغل نظيف الشركة تأسست تقريبا سنة 1980 كانوا يعملون قبل مع الحكومة في مشاريع الإسكان البيوت الشعبية ماشاءالله عليهم بس باقي كل شي يسونه من مطابخ باشكاله والمواد لي تبغيها غير المظلات من الاخر شركه شامله حق لي يبغي يريح نفسه من عوار الرأس ترى لي عموله إذا تم التعاقد ههههههه
اناارشح الانشاء و التعمير
بنوا لي و ما قصروا
العظم و الماي و تركيب بلاط و رخام نظام اللصق و امور اخرى. الخ
جابوا لي الكهرباء و العوازل من شركات تتعامل معاهم وما عندي مشكله الحمد لله
و لو تبي تشطيب بعد عندهم
و في عندك مناقصات. بعد في ناس تمدحهم
بالتوفيق
انا عندي ارض للحين ماوصلت لها الخدمات بالرفاع
المهم السؤال
لو ببنيها على حسابي الخاص وهي ارض هبه مادري منحه المهم من الحكومه يقطعون عني الر أي ول لاء وشكرا .
لهدرجه انعدمت الثقه في المقاول!
أي مقاول يحكمه العقد والتفاصيل ويحكم عليه الإشراف الجيد والشاطر والطيب هو ممكن يعطيك عقد متكامل بكل مراحله وفي يدك توقع وتعتمده أو لا حتى لو اخوك مب بس رفيجك
ولد عمتي فتح شركة وهم إخوان فاتحين كم شركة وكثير متوفقين بس هذا شارك عربي سوري .. يبين ناصح وزين وتفاجأ بسرقات له وصلت 800000 ريال وطرده .. رجال كبير سن ويتكلم بخبرة وكان يتوافق معاي في آراء كثيرة حتى ما توقعت منه هالحركة .. دوم يمر المجلس ونلتقيه يعني واحد منا حتى يلبس ثوب بس بدون غترة .. هذي شركات البركة كثيرة والواحد ما يدري متى تنكسر
شخص ثاني عماله وفورمنيته كلهم من جنسية عربية والرجال حبوب وطيب وأخلاق عالية يقول لي أدري بهم يسرقون بس أكبر الراس وأمشي
أفضل الشركات والعمال لبناء العظم الآسيويين وخصوصاً الباكستانيين للخرسانات والطابوق .. للبلاستر السيخ والسيريلانكيين .. للكهرباء والماي الفلبينيين وبعض الجنسيات غيرهم لازم يطلع واحد فلتة
نعم هذا أهم شيء .. انا نصيحتي تعقلها وتتوكل وتعقلها بالإجراءات اللي ذكرتها
شوف على خبرتي في أمور كثيرة ومقبل على الستين قضيت منها أكثر من 30 سنة في هذا المجال لكن عارف إني لازم أستعين بكيان قانوني هو الإستشاري وبخبرات ثانية اللي هي التخصصات الهندسية الثانية .. عقدي كان مع استشاري الأردن بيكلفني 120000 ريال وترددت لسبب المكتب بعيد وبيعين مكتب في قطر يخلص الرخصة وانا مب عارف المكتب ولا قال لي حتى اسمه .. بعدين يبغي يفرض آراء معمارية ويبرزها وقال لي لك حرية الاختيار أو ترجع للتصميم الأساسي والرجال معرفة من وقت الدراسة وأعزه بس ما فيه وقت لهذي التغييرات والمهم عندي استوى التنسيق مع استشاري البنية التحتية وادخال المخططات للبلدية للموافقات
ممكن هذا الإستشاري يكلفني فوق ال 200000 للتصميم بس متأكد بيسوي تصميم مدروس ومب مبالغ فيه انشائياً ممكن يوفر علي نفس المبلغ لو وقعت مع مكاتب زاد الله من زاد .. وشغلهم في الكهربة والميكانيك زين وهذا مجال خبرتي فيه ضعيفة كلش .. واللي بيبني يسمع نصيحة السيسي حتدفع يعني حتدفع
امسك شركه عدله و معروفه افضل و اضمن