مراجعة التصاميم المعمارية وابداء الملاحظات عليها (محدث)

دوم أي واحد يصمم يفكر في توزيع المساحات وبيشغلها بوشو

وكلامي موجه للمهندسين والمختصين أكثر من الملاك لكن للملاك كثقافة ينتبهون لهذا الشيء .. مثلاً نرجع شوي لدور السقف بنحصل غرفة التانكي كانت صغيرة وكبرناها شوي وعملنا فيها فتحة للركوب للسقف هذا وحتى يكون الدرج محمي وهذا إقتراح الإستشاري انا وقف تفكيري وقتها وشاب توه حديث خبرة .. انا جلست أرتبه شلون بيكون لاحظت فتحة الخروج للسقف داخلة داخل في الزاوية اليمنى الداخلية ممكن تشوفونها في المشاركات القليلة السابقة

زين شيصير لو غيرنا مكانها شيء بسيط .. غيرت مكانها قريب من المدخل الخطوط المتقطعة بس مسوي حجمها 1.2 في 1 وايد كبيرة صافي هذا باصغرها لين 80 عرض في 70 طول كفاية هي لركوب شخص واحد ومستحيل يشيل شيء ثقيل معاه التحميل يكون بحبل أو بكرين من البداية

https://i.imgur.com/Bevp6gK.png

الدائرتين الكبار قطر 1.4 للتوانكي المتصلين ببعض والقابلين للفصل لغسيل واحد أو استبداله واستعمال الثاني والصغار قطر 40 سم للسخانات وبيكون عندنا الفلتر والمضخة فيه مساحة متوفرة لهم

فوق أضفت قاعدة لتكييف المياه

هذا شكل الفتحة بعد التصغير المعقول وكانت قبل فوق فوق الصخانات في الزاوية العلوية يمين لو تنفذت على هذا الأساس بيكون العامل يدخل بين البايبات والمضخة والفلتر والصخانات لازم نشوف لهم مكان غير لين يوصل للدرج

https://i.imgur.com/2WGalk9.png

وهذا الشكل من فوق

https://i.imgur.com/dpIP0E1.png

الخط العريض هذا في حال ما عطوني ارتفاع متر زيادة لين 16 متر باركب ساتر على داير سور السقف من مواد خفيفة ممكن شبك زراعي أسود

شلون يكون إختيارنا المناسب للأرضيات كمقاس للبورسلان ووشي خطتنا لتشطيب الأرضيات؟

انا دوم أحب أبسط الوضع بعمل سكريد لكل دور بس هنا عندي فيه مستويات مختلفة بشكل بسيط 10 سم ارتفاع وفي منطقة وحدة بس .. هذي تحتاج قص وترتيب شوي غير وبالشرح بتوضح الفكرة

الفكرة الله يسلمكم إننا نمشي على تصميم أرضية موحد للدور الأرضي كله والخيار بورسلان بس محتار في المقاس وهل المربع أنسب أو المستطيل في البداية حاب القطع المربعة الكبيرة 120 في 120 باجربها قبل

سويت آوتلاين للحدود الخارجية بس مع الدرج ومنه باقدر أركب اللي سويته على كل غرفة وحيز صغير وباشوف شيصير .. طبعاً شلت الحوائط الداخلية هذي بينقص البلاط حولها بس الأساس هو نقطة البداية واتصال الخطوط لو بنسوي مثلاً فواصل أو لو بنسوي زيرو جوينت وبنخلي الفواصل مخفية تحت النعلات .. بين هذا وهذا .. نشوف أول الزيرو جوينت

https://i.imgur.com/eMP5u7d.png

الإستمرارية على نفس المسار لعتبات المدخل بتعطينا بعد هذا الشكل

https://i.imgur.com/aexnHR2.png

خليت حدود بلاط الدرج بالأحمر بس علشان أفرق بينها وبين حدود العتبات .. بيكون فيه تفصيل للدرج يختلف باسوي الكسرات تحت العتبات ( نظام العتبات الطايرة ) وبتكون فيه إنارة خطية

الزاوية تطلع أحلى والمربع أحلى باكبر المقاس بعد ل 1.5 في 1.5 أكيد موجود هذا المقاس

ال 1.5 تطلع أحلى وباجرب بدون زاوية تكون البلاطات سيدة .. وهي أصلاً بتكون رخامية الشكل أو بلون محايد ما فيه نقوشات وبتبين متصلة

https://i.imgur.com/kTPLmzP.png

هذا عيب نموذج الزاوية صعب شوي

ممكن هذا ينفع بدون زاوية 45 درجة

https://i.imgur.com/QiqW5I6.png

شيصير لو خليت نقطة البداية وسط الباب؟ خلوا نجرب

https://i.imgur.com/O2ArZkG.png

وايد أفضل وبواصل بدراسة كل منطقة بروحها وكذلك بدراسة أنواع بلاطات ثانية مستطيلة مثل ال 3 متر في 2 أو حولها فيه بعد 320 في 160 سم

وقفات بسيطة لكنها مهمة قبل كل مرحلة تركيب.. عساك على القوه اخوي بو عبدالله وعقبال العرووووس :)

الطريقة الثانية اللي إحتمال اعتمدها شفت عند سيراميك الخليج مقاسات كبيرة 3.2 متر في 2.6 متر على ما اذكر وشاك في ذاكرتي في الرقم الثاني إحتمال 1.6 .. قيمة اللوح شامل التركيب والقص من طريقهم 1700 ريال لو المقاس الأول يعطينا 8.32 متر مربع للوح ويطلع لنا سعر المتر المربع شامل التركيب والمواد من مابي مثل ما ذكروا لي حول 204 ريالات لو الثاني يطلع 5.12 متر مربع ويطلع سعر المتر 332 ريال يعتبر غالي وباشوف شلون معاهم ممكن وقت التركيب تنزل الأسعار بس بورسلان إيطالي وجودة عالية

نشوف شلون بيكون تركيب القطع الكبيرة .. شوي الوضع محير وبيكون فيه قص وايد ويمكن أفضل أركز منطقة منطقة ويبقى التجانس في نوع ولون الألواح الوحدة .. خطوط التركيب ستحدد لازم

يعني مثال عندنا صالة التلفزيون السفلية هذي بتكون مفصولة بباب زجاجي وحاجز عن بقية الصالة لمنع تداخل الصوت وبتكون جلسة تابعة لحوض السباحة ومطلة عليه

هذي لازم لها قص للبلاطات وأحلى البلاطة تبدأ من الحافة وفيه طريقة تفصل مكان تغيير البلاطة ببلاطة جزئية تحدد المحيط باوضحها لاحق إن شاء الله

https://i.imgur.com/srj2BPq.png

المستطيلات المحددة بالأزرق وخطوط متقطعة هذي السلابات الكبيرة للبلاط حتى ناخذ فكرة شكثر بنقص وشكثر نحتاج من بلاطات

كنت أتناقش وأحد الإخوان عن التناظر Symmetry وهذا توجه قديم جداً نقدر نسميه كلاسيكي قديم من بدايات 1900 وكسروه معماريي العالم بس للأسف منتشر عندنا وبعض معمارينا يعبدونه عبادة ويقاتلون من أجله .. شرحت كيف انا دوم أتعمد كسر التناظر في كل شيء حتى أغلب الوظيفية وأوظف الفراغ أفضل وبديت أعطي أمثله بالفيديو وبما إن الموضوع عن التصميم بحط الفيديو هنا

البعض يتخيل التناظر لازم يستمر للواجهات حتى من تحت لفوق ومن اليمين لليسار وهذا شيء مستحيل للي يفكر بذكاء ويفكر للإستفادة من الفراغات صح .. هذا مثال لبروز عندي كتلة بارزة غير عن الكتلة البارزة الثانية لو بنشوفهم بتناظر ممكن نحط خط التناظر مايل ب 45 درجة بما إن البيت جاي باتجاهين خط زاوية 45 درجة واتجاه ال 90 درجة المعروف وهذا من أصعب التصاميم وانسوا التناظر معاه أرجوكم


https://www.youtube.com/watch?v=ztlHRX_fsLM

المشكلة في مشاركات الفيديوهات ما اقدر احط الا فيديو واحد في كل مشاركة والفيديوهات حول 6 باحطها في مشاركات منفصلة

هنا متابعة للشرح لو طلعنا فوق الحيز السفلي للمكتب لحيز غرفة النوم فوق وهي متكررة كذلك في البنتهاوس .. الفكرة هذي الكتلة تحت دريشة عريضة وتختلف تخدم الفراغ تحت اللي هو المكتب مغطيها سور البيت ما تبين اللي يبين الجزء العلوي ما فيه داعي نكون حساسين ونخرب تصميم الغرفة الداخلي حتى نوزن الشكل الخارجي متناظر ومتصل من تحت لفوق


https://youtu.be/aEA0rTerXP8

كذلك داخلياً وتوزيع الفراغ الداخلي انا ممكن ببساطة أسوي كبت جهة اليمين وأوازن الغرفة كواجهة داخلية متناظرة اليمين نفس اليسار بس هذا غباء تصميمي عندي مساحات ملابس فوق ال 12 متر ما فيه داعي أزيدها بعد

هنا فكرة ثانية تعديل بسيط لدورة المياه أشوفه يسوي فرق بإذن الله


https://youtu.be/E0rTkSyHgtI