هذا مب اسلوب احترافي للعمل .. الظاهر المكاتب الاستشارية ماشية على مبدأ الوسطاء العقاريين اللي مقسمين المناطق بينهم!
عرض للطباعة
أوقات الإنسان يسمع وعود لكن الواقع غير وأوقات يطيح الواحد مع شخص مفهي وما يشتغل صح ولا يتواصل عدل ويلف ويدور وفي شغله تجاوزات هندسية وهذي البيئة السبب فيها قلة الرقابة والمتابعة من الجهات المختصة والحساب والعقاب .. عندنا إحنا الطب والهندسة يحتاجون رقابة من ناس فاهمين وتابعين للحكومة ما يحطون لي مهندس كهرباء يدير هيئة أغلب شغلها مدني ومعماري وطرق .. وصادفت مهندس معماري حديث التخرج وغير قطري يدير مشروع طرق ملياري وهذا لا يحدث الا في قطر كعكعة المحروم
موقفين بخصوص التصميم صاروا .. واحد معاي و الثاني مع صديق لي!
أما اللي صار معاي فهو اني رحت لمهندس (ما راح اذكر اسمه) من المشرفبن على المكتب بناءا على توصية شخص تعامل مع المكتب و مدح فيه ... بعد ما عطيتهم المتطلبات انتظرت التصميم المبدأي و بعد انتظار طلع شيء غير صالح للسكن و فيه هدر مساحات و عدم توافق مع المتطلبات ... بعد نقاش طلعت بنتيجة انهم يبوني اوقع معاهم و عقب بيسوون لي التصميم.
كشخص مب ضد ان المكتب يطلب توقيع عقد لكن على الاقل عطني فكرة عن مستوى المصممين.
هذا غير اني و ان قاعد مع المهندس كم شخص داشوا يتهاوشون و عندهم مشاكل مع المكتب و مؤكد اني ما راح اتكلم عنهم بعد ما شفت ردة فعل المهندسين معاهم .. طلعت بنتيجة ان المكتب ما راح يصمل معاي!
في نفس الوقت المكتب كان مشرف على بيت واحدة من العائلة و شفت مستوى الاشراف عندهم و تفاعلهم مع مراحل التنفيذ و التعديلات اللي يطلبها المالك واللي ما راح اخوض فيها .. يمكن كان عندهم ضغط أو خلل في الادارة لكن في النهاية انا عميل و جيت على السمعة و للاسف اللي شفته كان مغاير و إن كنت على معرفة شخصية بصاحب المكتب لكن هذا ما يمنع التطرق للسلبيات اللي شفتها!
أما موقف صديقي فاعتذر عن طرحه لحفظ خصوصية الصديق و اني مب مطلع على كل التفاصيل لاني لمرحلة معينة كنت معاه و عقب تركته مع المكتب و ما يحتاي اتكلم عن موقفه اللي كان سلبي!
في اشياء لاحظتها في اغلب مكاتب الاستشارات .. دفعاتهم 50% قبل ما يبتدون بشيء و كلهم يصممون حسب اشتراطات البلدية و أي شيء خارج ما تطلبه البلدية للرخصة ما يسوونه .. رحت كذا مكتب و عرضت عليهم المطلوب و السواد الاعظم من المكاتب رفض بحجة ان طلباتي خارج متطلبات البلدية للرخصة ..
حصلت مكاتب توفر رسمات تفصيلية للتصميم و عندهم ابداع و افكار و حتى في مكاتب خارج قطر عندها استعداد تقدم خدمات على مستوى مميز و السعر مؤكد بيكون أعلى لكن المقابل هو المطلوب.
ما راح اتكلم عن محدودية و تدني مستوى المكاتب و حتى انعدام الابداع عن الغالبية منهم المعتمد على مبدأ القص و اللصق لكن نرجو العثور على مكتب يصمم بشوية ذمة و طلباتنا تراها بسيطة!
بعد إخوي ساوث كي فيه مكاتب تسوي شغل مميز وغير عن الدارج وبعضهم وصلوا العالمية وغطوا عليها مثل مكتب ابراهيم الجيدة وما امدحه لمعرفة أو شيء إلتقيته يمكن مرتين بس الرجال وفريقه أعماله تشهد له .. فيه فريق ثاني يقوده رسام متولع بالبناء القديم وموثق للتراث البحريني جاء قطر واستوى قطري وأدار مشاريع كثيرة عيبه يفتقد للتأهيل المعماري الخالص ويحب الرسم لأجل الرسم .. يمكن لدرجة معينة يتشابه مع خالي وخالي رسام هاوي ويشارك في معارض وعنده لوحة انباعت بسعر كبير ما أذكره إسمها أم الحنايا .. شفت تصميمه لبيته رسم من خيال رسام وأفكار خاصة به ولا قدرت أجادله .. مقتنع بالبيت الأرضي ومقتنع بالكتل والتغيير في الإرتفاعات
مكتب اتحاد قطر للتخطيط بعد ما توفى المعماري اللي كان يديره ضعف معمارياً لكنه مكتب قوي في باقي التخصصات واللي يهم باقي التخصصات وسعره غالي .. لازم أرسل لهم تصميمي أشوف إذا بيخلصونه أو لا
من فترة سافرت على أساس أشوف مكتب استشاري يكمل باقي التخصصات في الأردن وما كنت أصلاً مقتنع بالعملية من الأساس بس لي صديق من أيام الدراسة هناك وعنده مكتب ولي قريب 30 سنة ما شفته على الطبيعة .. رحت وتلاقيت معاه وما قصر ناقش معاي تصميم في نقاط انا مفكر فيها بعمق وواصل للحل الحالي .. وكانت فكرتي إني أشوف المكتب والمهندسين اللي معاه بس طلع مسكر مكتبه وحسب كلامه يدور موقع ثاني وعقده يقارب أسعار الدوحة وبدون الرخصة الرخصة علي أشوف مكتب يطلعها وهو قبل قايل لي نعرف ناس في قطر .. المهم شلت الفكرة من بالي واعتذرت له بأني غيرت رايي والتصميم في قطر بيكون أسهل والمكتب بيتقبل المسؤولية والمتابعة سهلة .. حتى عقده كان فيه أشياء كثيرة تكلمنا عنها وانها بيتضمنها العقد في الكتابة ما انضافت .. وكان يبغي ملاحظاتي على العقد وصعب انا تناقشت في كل شيء وأرجع اطلب اضافته وكأني أطلب طلب خاص والكلام ما صار له يومين ما يلحق ينسى من هشكل قلت حق نفسي كشكها ما تعرضهاش
بارك الله فيك يا الغالي .. فيه مكاتب مميزة عندنا لكن ما تعلن عن نفسها و ما ادري السبب.
بخصوص المكاتب خارج قطر تواصلت مع مكاتب في الكويت و السعودية و الكل ابدى استعداد و جهوزية للتصميم حتى ان مكتب كويتي سألته عن الرخصة فعطاني ارقام ناس صمموا عنده و تواصلت معاهم و الكل لما سألته عن المكتب و ليش تعامل معاه قال ان المكاتب عندنا تعبانة و ما عندهم ابداع و نقاط مختلفة ما له اعي نتطرق لها.
في مكتب كويتي فاتح له فرع في قطر .. سعره غالي وايد لكن يعطيك تصميم متكامل و شغله فوق الممتاز في اي مشروع يمسكه تصميم و تنفيذ!