يا هلا بك اخوياقتباس:
المشاركة الأصلية كتبت بواسطة Q0T0R
الله يسلمك يسرك الحال وانت كيف حالك؟
ألحين فهمت إنت تتكلم عن الخرسانة تحت البلاط في الدور الارضي وهذي تعتبر انشائية ولازم لها تفاصيل مدروسة ومحددة في المخططات .. حق بيتي سويتها بدون حديد نهائياً ووفرت شوي بس طلبت خرسانة ضعيفة وكثيرة المياه وخلطنا معاها مادة فايبر سائل اسمها فيبروك مع رقم نسيته موجود الاسم بالضبط في موضوع العقود المثبت ونفس الخرسانة استعملتها للحوش كامل بدون حديد .. صراحة طعت الاستشاري فيها وكانت ضربة معلم من الاستشاري .. ما فيه داعي ترشها بالماي وتعتبر ذاتية الاستواء .. Self leveling .. وتجي ناعمة لأنها بدون كنكري وثلاث أيام تكون جاهزة للتبليط أو لتثبيت السجاد عليها بدون بلاط شعبي
أكيد الخرسانة تمنع دخول الأرضة والارضة تحتاج مبيد .. لكن المبيد تنتهي فعاليته بعد فترة والارضة تنشأ وارض قطر مليانة أرضة أو نمل أبيض وغيره من الحشرات .. فيه جزء غير تدخل منه وهو التقاء الحائط بالأرضية هذا أما يحطون فيه لوح مرن مثل الكرتون وهو من مادة خشبية أو بعضهم بدون شيء ( العليمية ) ويبقى شق فاصل تدخل منه هذي الأرضة لكل محتويات الخشب في البيت .. وفي حالة الجزء الخشبي الأرضة تاكله وتطلع فوقه تاكل كل نعلات وأبواب البيت وكل شيء خشبي .. شفتها ماكلة حتى بلاستيك أرضيات رياضية حق صالة رياضية وطالعة من مكان الفاصل الانشائي المعبأ سيليكون بعد انتهاء صلاحية السيليكون
الحل اللي سويته انا والمفروض اسوي صيانة بسيطة وضرورية كان كشط طبقة من الكرتون أو الخشب اللي في الأطراف واسمه القانوني والهندسي compressible board وبعدين صبينا عليه دواء الأرضة حتى تبتعد الأرضة عنه وبعدين غطينا الجزء العلوي بنفس نوع المادة المرنة اللي تستخدم لفواصل السقف .. هذي الصبية الانشائية البعض يمدد تمديداته عليها ويحط دفان أو رمل بعضهم مغسول وبعضهم أي كلام ومليان بيض نمل عادي أو حتى أرضة وغيرها من الحشرات ويتورطون بعد السكن
انا بعد فوقها حطيت خرسانة نفس التحتية تغطي كل البيبات تحتها وبعدين التبليط حتى اضمن ما يبقى مكان للنمل يعيش فيه والحمد لله نجحت العملية فيما عدا بعض البلاطات اللي قاموا بسبب ضعف التركيب واستوى تحتهم تجويف بين البلاط والخرسانة تحت عاش فيه النمل بس بمبيد قوي في هذي الفتحات راح كل النمل لأنه ما يقدر يحفر لأعماق تحت وينخش عن المبيد
هذا باختصار والبعض يبنون بنيان غالي ومكلف ويستثمرون حتى في قصور ويجيهم واحد فني ضعيف يقول حطوا بودرة تحت البلاط ويصدقونه والنتيجة تبين بعدين
