اقتباس:
المشاركة الأصلية كتبت بواسطة Bu Rashid
يا جماعه ابي رايكم في هذى الاقتراح او التركيب
جميع الملاحق تكووون سبليت
جميع الغرف تكون دكدت سبليت
الصالات والباسمنت سنترال
وجزاكم الله خير ...
عزيز و غالي يا بو راشد..
باللي الله يقدرنا بنفيدك في الشور...
بس بشرط..تنفذ ما سيأتي في اخر هالسطور :omg:...
اخوي...اذا انك في مرحلة التصميم للبيت...
فالراي رايك و الشور شورك
و بيتك و ميزانيتك انت ابخص ابها...
و مأيدك في اختياراتك..لانها بتدلعك و بتدلع
العيال 100%..يستاهلون اتوسع
عليهم و اترفههم دامك تقدر على هالشي
بلا بطر و لا تحميل عمرك ديون...
( و اذكرك هنا بحديث الدينار... الذي ورد في صحيح مسلم...
عن أبي هريرة قال قال رسول الله صلى الله عليه وسلم دينار أنفقته في سبيل الله ودينار أنفقته في رقبة ودينار تصدقت به على مسكين ودينار أنفقته على أهلك أعظمها أجرا الذي أنفقته على أهلك )
هاي اول شي..
ثانيا...
اما اذا انك خلصت الخرايط و عادك ما بلشت بنيان
او بديت و ما صبيت الدور البيسمنت (او الدور الاول للي ما عنده سرداب)...
فهاي احسن حد بيفيدك (بعد مراجعة ميزانيتك) هو الاستشاري..
اقصد استشاري البنيان المشرف ولا المصم للبيت (او كلاهما)...
ثالثا...
اذا انك موصل مراحل متقدمه في البنيان و بالذات اذا انك صاب
الدورين للبيت... و ما كنت بالاساس مسوي حسبه حق دكتات التكييف..
فاعتقد انك من الافضل انك تنسى "المركزي" بالمره..
لانه فيه تعقيدات فنية للدكتات الضخمة الجاية و الرايحة للوحدة
الخارجية...
و اهني تقل لك الخيارات..الى خيارين...
الدكت سبلت و السبلت العادي..
الفرق بينهم بيكون بشكل رئيسي في الشكل و السعر الكلي...
يعني..الشكل و الترتيب للدكت سبلت بيكون ارقى بكل المقاييس..
فهاي معضله وانحلت..باقي شغله وحده و تتخذ القرار النهائي...
نرجع يا طويل العمر ..للبيزات...
شوف، اذا عندك بيت تحتاج له بحدود 20 مكيف اسبلت..
ما بين غرف و مجالس و صالات...
يعني انت تتكلم عن ميزانية بحدود
50 الى70 الف ريال للمكيفات حسب النوع
و الحجم..الخ الخ الخ..يعني بالمتوسط 60 الف ريال!
و لنفس البيت..اذا انك بتحط له دكت اسبلت (بدون الملاحق)...
هقوتي انك بتتكلم عن ميزانية في بحر 200 الى 300 الف..
قول و انت راعي مكاسر ممكن تنزل لين 180 الف..
هاي للتكييف الدكت اسبلت...و لا تنسى انك في هالحالة
لازم (اجباري) اتحط للبيت كله سقف معلق(جبس بورد)..
فاذا انك موب مخطط لهالجبس و لا مخليها عالتساهيل
حسب ما جات و الميزانية و ضربات اسهم البورصات..
فمن الحين تحسب لها احساب...
اهنيه...اعتقد تتضح عندك الخيارات...
و انت و بصرك.. الميزانية و حسبتها صح
هي المحك الرئيسي..
بس تدري يالغالي....
الحين جا دور الشرط اعلاه
اذا انك بتختار تقط كل كلامنا برع
و اترد على الكنديشنات...موب جنرال
الا بوحصان..يعني على قولتك ....
1500 و انقز..مكيف شبيك لبيك السنداره بين ايديك...
امانه...لا اتقول حق "وزارة الداخلية" انا احنا اللي
شاورنا عليك و هالمنتدى خرب عليكم احلام "احلى بيت"...
بتطنش و اتدور الرخص....ترى مالنا خص...
و ما عرفنا عن موضوعك..كيفك..ترقد وين احنا ما انعرفك:secret:
ان قلت تم الشرط....
ترى كلامي لك هديه... بدون جزيه..
و اتمنى ان حد ممن هو اعرف يعدل على اي شي
في كل كلامي..
ترى بوراشد رجال يستاهل الفزعه
افضاله على المنتدى سابقة غيرة
بدل المره...اميه!.
تحية لك و لكل الاخوان...
و (خل الطابه مغطيه:) )