لازم نلوم الحريم في كل الأحوال !
السلام عليكم
مساكم الله بالخير
بسم الله ندخل في الموضوع :
1- الأعراس : ياخي هالحريم لعوزونا ! عرس الرياييل مايكلف لازم عرس الحريم يكلف ، قاعة مادري بكم ، وكوشة مادري شلون شكلها :anger1: وبعض البنات يبون طريقة معينة للدخول لهم ولازواجهم ، ياخي بدون عرس الحريم تقل التكاليف
2- ليلة القرنقعوه : ياخي هالحريم مشكلة !! لازم أكياس معينة لعيالهم ولازم ثياب خاصة وتوزيعات مادري شلون شكله ، خربوا التراث وقعدوا :anger1:
3- السفر : ياخي الحريم يحبون يدورون الأسواق ووايد يشترون ، مايخلون شي مايشترونه
4- الخدم : فلانة عندها 3 او 4 خدامات شدعوة!! ماتبي تسوي شي وماتبي تتحرك وكل هاذول خدم حق بيتها وعيالها
طبعا اللي تم ذكره مجرد أمثلة ، وفي غيرها الكثير
يمكن مانقدر ننكر ان بعض الأمور تحصل سواء في مجتمعنا او مجتمعات ثانية ، لكن السؤال المهم :
هل فعلا المشكلة في الحريم ؟؟؟؟؟
اللي ابي أقوله يالربع :
ترى المشكلة في الرجال من البداية
يعني اللي يتهم الحريم بكل هالصفات ، طيب وين دوره هو ؟؟ ليش صرنا نقط كل شي على الحريم حتى في حالة الغلط وين دور الرجل؟
ادري الحريم امهاتنا وخواتنا وخالاتنا وعماتنا ، يمكن يغلطون
لكن اللي يبي ينتقد زوجته ، وين دورك ليش مامارست قوامتك؟؟
اللي يبي ينتقد بنته : وين دورك كأب؟؟؟ ليش ماسنعتها؟
اللي تنتقد بناتها : وين دورج كأم ؟؟؟ مب انتي اللي ربيتيهم ؟
هل المشكلة فقط من الحريم ؟؟ ام ان غياب الرجل عن المشهد والسماح بأمور كثيرة أدى للوضع اللي مايعجب الكثيرين؟
الكثيرين صاروا اول مايشوفون وحدة ممشاها لاسمح الله ................... ، الواحد منهم يقول : وين ابوها؟ وين اخوها؟ وين زوجها ؟ الشرهة عليهم هم اللي امخلينها -----> يعني المشكلة فيهم من البداية ؟
المايك لكم
ملاحظة : ماانفي الخطأ عن الحريم في أمور كثيرة لكن اعتقد ان الرجل له دور في الموضوع بشكل أو بآخر
ادري ان في بعض الأحيان المعطيات تكون ضد الرجل (ومابي ادخل في تفاصيل لان الموضوع بيتشعب ) لكن هل تشوفون الدور مشترك ؟