*** على أعتاب افتتاح مطعم (( فأرجو المشورة ))

السلام عليكم

الموضوع بكل اختصار .. انا واحد الاخوة نبي نفتح مطعم شراكة بيني وبينه

وتم استئجار المحل لكن تنقصنا الخبرة أو بالأخص الدراية بالأمور الفنية من عدة نواحي ومتحاج مساعدة أصحاب الخبرة في هذا الموضوع

على سبيل المثال .. مدخنة المطعم أو الشفاطة لقيناها بـ 8000 ريال ولقيناها بعد على 21 ألف ريال ولا عندي خبرة فيها

والامور اللي محتاج شوركم فيها هي :

أمور النظافة ومتطلباتها

الديكور الداخلي واماكن أفضل الأسعار

تصميم شعار للمطعم + لوحة

متطلبات البلدية ومحظوراتها أو أمور علي تجنبها

الحصول على الأكياس ومواد التغليف من ورق وكلينكس وأفضل الأسعار

طريقة تصميم المنيو

واذا عندكم أي نصايح أو أفكار اخرى فأنا بحاجة لها

بالتوفيق ان شاءالله

فيه سؤال مهم ،، تخطيط المطعم يكون على اي مستوى و موقعه وين ؟

يعني شغل مطاعم هنود ولا تخطط يكون مطعم يقدم اكلات لبنانيه او منوع .

حجم المحل ؟

انا مالي خبره بس اتوقع مثل هذي الاسئله بيحتاج اجابتها الشخص الي يبي يقدم لك نصيحة .

بالتوفيق مره ثانيه

بالنسبة للتصميم ! اذا تبي تصميم فانا حاضر الله يطول بعمرك

الخاص موجود

بعض النقاط:

* اذا كان عندك مشاوي، الشفاط العادي ما ينفع، لازم تحط شفاط توربين، و هو الغالي، والا بينترس المطعم دخان.
* اهتم لموضوع التكييف، كثير من المطعاعم تكون حاره.
* شوف لك سواق يدل الدوحة، كثير من الناس يبون هوم دلفيري.
* لا تحط اسمك كمدير في رخصة البلدية!!!
* اعمل عقود مع الموريدن (دجاج+علب الالمونيوم+ ....الخ) عشان يعطونك فترة سماح.
* خل الكاشير واحد من طرفك.
* الاكل المطبوخ الذي ما انباع (دجاج شوايه‘ شوارما،) في نهاية الدوام، لا تبيته لليوم الثاني و تبيعه على الناس، (تصرف فية، بس لا تعطية العمال الشغاليين في المطعم،. ودة الجمعية الخيريه).
* لا تخلي العمال كلهم من جنسية واحدة، و احذر من الاتراك.
* سراميك المطبخ لازم يكون لونه ابيض.
* شوف لك رقم تيلفون سهل للمطعم.
* اعمل كنترول قوي على المخزن.

نتمى لك التوفيق

شفاطة ب8000 وب20000

الله يذكره بالخير الي اعرفة في المانيا شاري شفاطة ب400 يورو والاغراض هناك وايد رخيصة للمطاعم لكن عندنا يشفطونا شفط :(

الله يوفقك ويسهل امورك

راجع الخاص

اقتباس:

---

المشاركة الأصلية كتبت بواسطة وحيد-الشوق

شفاطة ب8000 وب20000

الله يذكره بالخير الي اعرفة في المانيا شاري شفاطة ب400 يورو والاغراض هناك وايد رخيصة للمطاعم لكن عندنا يشفطونا شفط :(

الله يوفقك ويسهل امورك

---

بس شحنها بيكلفه خصوصا وزنها مب خفيف ..


موفق اخوي

هالله هالله بالأسعار الزينه لأعضاء المنتدى

السلام عليكم

العذر والسموحة منكم على التأخير في الرد .. انشغلت ولا مداني ادخل و ارد

Aaziz

مكانه الوكرة اخوي ومستواه قريب لمطاعم الفاست فود .. ويعتمد على الشوي

بو راشد 1

الله يجزيك خير على الإفادة الطيبة .. والله يقدرنا للي فيه الخير

وحيد-الشوق

يخوك الود ودنا لكن السعر ضدنا ههههه

كاشف الغطاء

ترجع بالسلامة يالغالي :)

دلال قطر

صدقت اخوي

حمد 2002

ههههه أبشروا .. حسبتنا بإذن الله على تغطية تكاليف المطعم أولاً والربح المعقول ثانيا ..

والله يوفق الجميع

ويعطيكم العافية على ردودكم وافاداتكم ويجزيكم كل خير

ولازلنا نستقبل آرائكم وأفكاركم حتى بعد افتتاح المطعم بإذن الله

لي خبرة لا بأس فيها بالتصميم
اذا حاب اسويلك لوقو للمطعم ، راسلني ع الخاص